أمدرمان توقع علي دفتر الجدارة كل حين*

*أمدرمان توقع علي دفتر الجدارة كل حين*

امس طلعت من بيتنا في ودنوباوي خايفة معاي اخواتي و أبوي بكينا علي بيتنا الماطلعنا منه الا لزيارة أهلنا في البلد ، بكينا أمي الماتت زمان و زكرياتنا مع البيت الربتنا فيه و عايشين بذكرياتنا معاها….
مرقنا لانو الجيران حلفوا علي أبوي يطلع لانه في دانات وقعت عن الجيران.
جرينا و بركنا في الواطة و كلنا هواجس نقعد وين و هل حنبقي زي الناس المشت أجرت في الاقاليم بمليار و حنعمل شنو كان ما لقينا مكان … ربنا يسترنا …. و مشينا الثورة … مع مدخل الثورات اتخلعنا لانو في شباب جوا جارين علينا بكبابي الموية و قلعوا مننا شنط اليد الكبيرة و الأكياس الخامنها لكن الخلعة راحت لما مدوا الموية و السندوتشات الجاهزة شباب و شياب هم الزاد رجال حارة . كلوا كوم و الحصل لما وصلنا بداية شارع النص بين الحارة الأولي و الحارة التانية … ناس امسكوا في ابوي من يدو بيجاي من الحارة الاولي و ناس الحارة التانية بي جاي … واحد يقول لي تعال بيجاي عندنا غرفتين و حمام حقات اخوي طلع بورتسودان مع نسيبته عيانة ز قال يدوهم لأسرة ..واحد تاني يقول ليه حرم تجينا نحن ارح الغدا … هوي يا هشام اسكت انا المسكتوا … زح يازول عليك الله انت سقت ناس كتار امس …. و مالو انت ارجا ديلاك جايين …. اي الجايين برضو في مكان ليهم فك عمك دا خليه لي يابنات كلموا ابوكم قولوا ليه يلا معانا …. اختي معروفة دمعتا قريبة قعدت في التلدوار و تجعر و ابوي دموعوا نزلت مع بكاء اختي خلت نسوان الحلة طلعوا و جات مرة هي الأصالة و جمال امدر حضنت اختي و تقول ليها ما يحصل إلا الخير و اختي تبكي زيادة لانها كانت بتبكي و نحن معاها بنبكي من الخير الصابي و نفسنا و روحنا ما قادرة تعبر عنه غير بالدموع… المرة دي من حنيتها بتقش لاختي عيونا و نخرينها بيتوبها اللابساه و هي ما بتعرفها .
جو ناس ورانا و برضو البكا اتواصل منهم بسبب النزاع بين اهل الكرم في الضيافة …. جا راجل كبير في المقام و هو الحكمة البتظبط أي حماس و قال كلوا واحد و كلكم حبابكم خشوا محل دايرين ادخلوا جوة البيوت الوقفة دي خطرة … خلوهم يمشوا هم محل دايرين حرم كان طلعونا من بيوتنا نطلع ليهم….. نحن بنحلم ….كفايه كدا كتير علينا خلونا نوقف بكا عشان نشوف وشوشكم الكلها خير و خلونا نهدأ و نتأمل في جمال السودانيين.
يارب دا شعب ينضام و بلد تضيع …. احلف ليكم السودان دا ما بتجيهوا عوجة الا المقدروا رب العالمين كان فيهو ديل بس ، خلي الزيهم و الخير في السودان كتير … يارب تجيب الخير