مسدار شوايقة معتقين لاستقبال كابتن الهلال والفريق القومي اخي وصديقي الانسان المهذب والمتواضع جدا نصر الدين عباس جكسا الذي إستقر في مدينة كريمة قبل عدة ايام منتقلا من داره العامرة بالحارة الثامنة الثورة بام درمان وتصحبه عائلته.
وهنا الاستاذ ابراهيم الكرسني يرحب به في هذا المسدار:
أهدي هذا المسدار إلى كابتن الهلال ومهاجم المنتخب القومي السودني، حينما كان السودان سودان، والكورة كورة وأقول له “مرحبتين حبابك.. واليوم السعيد الليله جابك” وحبابك ألف بين أهلك ومحبيك ومعجبيك في مدينة كريمة وضواحيها، متمنيا لك طيب الإقامة وعودًا “حميدًا مستطاب” حينما تصمت المدافع وتقف هذه الحرب العبثية.
أخوك ومحبك
إبراهيم الكرسني
مساء الأربعاء
الموافق ٢٠٢٣/١١/١
…………..
مسدار:
“جكسا مشرف كريمة”!!
…………..
من ولدوك ما فارقت أم درمان
إلا إن كان مشرف بره للسودان
من شق الصباح شقيت
رمال وعتمور في درب الشمال شريان
شالك باص ومو عارف
منو الجواهو يا حبان
زولا في الشمال لي جدود زرعو وعمرو البلدان
قبال ما البلد يتصاب
قبال ما يهدمو الكيزان
…………
نعم أهلي
جاكم زول عزيز بلحيل
جاكم جكسا بي ذات نفسو
زول معروف
وحاشا يمين من النسيان
………
دحين يا ناس
أنسو هلال أو مريخ
أبقو إتلمو رجال ونسوان
وختو الليد فوق الليد
عشان جكسا وعشان أهلو
يكون مبسوط
ويعيش وسط أهلو في تحنان
لا يضوق زهجه
لا ضيق خلق يغشاهو
لا يومن يقول تعبان
…………
“ديل أهلي”
كل زولن يجيهن ضيف
يقضي أيامو بيناتن
ما بشيل هم ويعيش في أمان
وكان الدنيا ما ” بت كلب”
زي ناس جكسا
يوم بيفارقو أم درمان!!
وكان الدنيا ما ” بت كلب”
زي ناس جكسا
يوم يتذلو في السودان!!
