معالم أمدرمان :” ليمون “عبد الرحمن حامد (الضيعوك)

من أشهر محلات الليمون في امدرمان
زمان كنا لما زول يقول انو من امدرمان ونحس بيهو كذاب بنسالوا محل الضيعوك وين ؟
ماهو ماممكن تكون من امدرمان ومابتعرف بت بتي ولا الضيعوك ولا فريق تاما ولا أمية ابوعكر أو اسماعيل الطهار
لانو في الحالة دي انت جاي ساكي كيس ..
ليمون الضيعوك لصاحبه عمنا عبد الرحمن حامد الامدرماني الموردابي القادم من قرية الشيخ طلحة شرق سنار
أسس في العام 1961 محل ليمون يعتبر الان من أقدم المحلات في امدرمان في مجال صناعة عصير الليمون يتقدمه فقط محل حسن قرشي باعوام لأنه تأسس في نهاية الخمسينيات
سمي محل عبد الرحمن حامد باسم الضيعوك عندما إشتهرت أغنية وردي (ضيعوك ودروك انت ما بتعرف صليحك من عدوك إستغلوا الطيبة فى قلبك وبى إسم العواطف خدعوك )
وأصبح يقال لكل شخص لم يشرب من هذا الليمون وشرب أصدقائه دون علمه “أن الجماعة الضيعوك”
يقع المحل في الجانب الشمالي الغربي لسوق الموردة لصيق بمسجد السوق العتيق ..
يقدم المحل عصير الليمون وعصير الشعير ..
من المشاهير الذي يترددون علي هذا المحل قديماً
عبد الرحمن الريح والسر قدور وعوض أحمد خليفة وكمال ترباس وعمر الشاعر