حليل أمدر الصبحت ذكرى ….!

أم درمان ذكريات مدينـة

من علايل ابروف للمزالق .. من فتيح للخــور للمغالق
أتذكرنا بلــدنا ونيلهــا
إتْشعبطنا علي التُرمــاج
هدومنا ملانة تراب وعجـاج والكمساري يكورك فينا خُشْ لي جــوه.. وحاسب أوعى !!
كم من كارو ولوري سفنجــه وخلف الزنكي وسـوق الملجــه
تكاسي الطرحــه تفضي وتملا
بــيع قطــاعي وبــيع بالجملــه
وجنب *(التُمَّنه)* عالــم جالسة بتلعب “ضُمنــه”
جنب *( شاشاتي)* وناس *(حجــار)* *(ديمتري البازا )* وصــوت *( زنقار)*
وصوت المغني: *((من بف نفسك يالقطـار ورزيــم صدرك قلبي طــار وينو الحبيب انت شلتو جيبو يا القطــار ))*
بياعين في كل مكان
ند وعطور وبخور تيمان حدادين .. و برادين .. كهربجيه وكم نجار كومسنجيه وصنايعيه وأفنديه قابضه بتحسب في الماهيــه
وبالله عليك ياماري علي ســوق أمدرمــان
أهــدي سلامي الى الأعيــان
*(( شيخ السوق الرجل القامه الهيبه الحاج صديق عبدالله ))*
فضــل المولى وحــاج عثمــان
ولو لاقاك عباس رشــوان ســرور وهريدي وعم شلقامي وشيخ سلمان
وود
*(الأغا وكزام كمان )* اتلقاهــم بالأحضــان ..
أحجز كرسي في مطعم برسي وبرد جوفك من خيرات جورج مشرقي
وميامي العامر بالخــيرات وقــول *(للسنجك)* ولي *( ود بني) ..*
أفخــم شيلة في شــارع العدني
ريح حبـه .. تابع الجوله .. ولف بي غــادي
علي التنقاري والعبــادي
وخليك ماشي.. رايح وغــــادي
في الشنقيطي وشــارع الــوادي
أغشى
*( تبيدي)* وأولاد *(ملــه)*
وخُد لي عروسك خاتــم ودبلــه
وأحفظ مالك .
وبص في يمينك .. وبص في شمالك شــوف واتملي .. في خلــق الله أحمد الله وريح بالك
وأملا عيونك بهجــه ومتعــه
وفجأة ونحن في ساحة *( الشهداء )* طلت لينا بدور ” القلعــة ”
آخر بهجة وآخر روعــــه ..!!
وصوت المغني : *((العيون النوركن بجهرها..غير جمالكن مين السهره (( يابدور القلعة وجوهره !! ))*
سرنا معاها عريس وعروس سيره وزفه لشــارع النيــل
اتباخخنا بمويــة السيل
وكم غنينا في عز الليــل
موجــه تغني .. وموجــة تشيل
وصوت المغني *( عريسنا سار البحرٍ ياعديلة .. وقطع جرايد النخــل .. ياعديله )*
ولما سمعنا دق النوبــة في حمد النيل
ونقر الطار رحنا نقزنا كبار وصغار
اترحمنا علي االأبرار
إنشاد ديني : .. *( لوح من النور البراق) ..*
واختم قولي بالصلاة معظما
نقرأ الراتب في *(البلديــه)*
وكمان المولد والليليــه
في حي *(مكي)* *و(المهديه)*
وجينا دار الإسبتاليــه
نغشى في يوم الزياره ناس عزيزه علينا غاليــه
النساوين والصبايا العواميد جاية ماليه
وفي الدهاليز الأنيقــه مارقــه *(سيستر)* وداخلة دايه
*(دوبيت)* من أشعــار الخليفــه يوسف الحسن : *(شهرين دراجين راقد علــي كوعي ،، عليــل في العنقريب اتطبقو ضلوعي .. الأهــل الكبار ماعرفوا موضوعي ،،، والهدم الجديد فشيتو بي دموعــي ) ..*
بالملازمين احتفلنا وقدلنا في ود أرو واتمشينا لي ود البنا
وكم دندنا مع الفرجوني وود البنا
وصوت المغني : *(امتى أرجع لي أم در وأعودها)*
*اتسامرنا في (( بيت المــال )) ..*
واستبشرنا بحسن الفــال
واتحكرنا قعدنا لعبنا *(كونكان عشره )*
تحت *(الدومه)* و *(ســوق الشجره )* صغار وكبار وبهجة وفال ..
وكان في النيــه .. يبقي مقيلنا في دار *(الهجــره)*
وقبل ماتمغرب علينا شلنا خطوتنا ومشينا
جينا داخلين *(المظاهر)* والكهارب من بعيد في *(المسالمــه)* نورها باهر … وصوت المغني : *(( ياظبيــة المسالمة بالحاصـل بي انتي عالمــه ))*
وقفنا في *(حي العرب)*
نحيي بي كل الأدب
لي أســاطين الطــرب
عزفنا مزيكة قرب
وصوت المغني : *(( أنا في شخصك بحترم أشــخاص))*
اتذكرنا أماسي نديــه
أعادت لينا مشاهد حيــه
جرتق وعرضه في حي *((العرضــه))* *و(( الردميــه)) ..*
صنــدل فايــح من صبحيــه
في *( الهاشــماب)*
و( العباسيــة )
وصوت المغني : *(أطرد الأحــلام ياجميل واصحــا) ..*
اتهندمنا .. واتعطرنا ورحنا سهرنا اجمــل سهرة
في حي *(الأمراء )* هناك صباحي بي خــلف الله ..
ورمضــان زايد والمأمــون وأحمد جمعــة
وقمنا لحقنا صلاة الجمعــه
وعــدنا نكمل للصبحيــه
حليل المولد *و(ســوق الزلعه)*
والتهليل في يوم العيد وسط الحي .. والناس مجتمعه
وسالت دمعــه
أهاجت فينا كوامن لوعــه
لما طرينا شــوارع الحَلــّه
ولعب البلي والكرتلــه
سينما برمبل والوطنيه
*(وعنتر وعبله)*
شراب *(القله )* و *(موية الزير) ..*
ســوق *(المويه)* ومقهى *(الزيبق )* و *(أحمد خير )*
دكان موسي .. وبرعي التــرزي .. سعيد العربي .. *و(سمك السبكي)*
الليمون في حي البوستــه وباسطــه *( بيِّن)* و *(باباكوستا) ..*
طرينا في وهله زمن الجهله وضل النخله ونوم السهله
حاجة حنينه وخالتي سكينه وغنــوة حنينه ..
وصوت المغني : *(الزهــور صاحيــة وانت نائم ) ..* *(يتداخل مع أصـوات اطفــال) ..*
*(الله خلق للنعجة ضنب .. الكوم بقرش والدقــة بلاش) ..*
الأنداد أولاد الدفعـة
سعيد وكرومة وتنقو وسمعه
*(الدافوري)* صباح الجمعــة
وفي العصريه وقون المغرب .. لما تمغرب للمغلوب احسن من ميه
ويا ما ضحكنا .. لما بكينا يوم سكتنا كلاب *(الحلبه)* ومن الخلعــه وكتر العجلــه
اترادفنا تلاته في عجله
وتاهت بينا دروب الرجعه دخلنا في شــارع لقينا اللمة وونسة وطلــة عرفنا النــاس وعمك ود البصير وديل ناس ودنوباوي كمان نبراس وسقنا مشينا .
واتدلينا في حي العمــده
وطابت لينا هناك القعده
جنب الزول النام واتمد
وخاتي ضراعو تحتو مخده
وطفله صغيره في عرض الشارع قايده أبوها وماده القرعــه
وصوت المــادح
جنب الجامع باكي ونائــح
*(ياراحلين الي منيً بقياد هيجتموا يوم الرحيل فــؤادي ) ..*
حليلهم أهلنا الكان ليهم شنه ورنه
أهل الوجعــه ربنا عالــم كانوا معالم شامخــه أبيــه
لا باسبورت ولا جنسيه
وفي القاسيات كان ليهم فزعــه
يدخل المغني .. صوت أبو داؤود .. *((حليل الفرقه من بكره .. حليل الأصبحت ذكرى )) ..*