المنوعات
لازم_تقيف كلمات الشاعر أزهري محمد علي :
(لااااازم تقيف)
الحرب لااازم تقيف
خضنا بحر الدم الحرام
ونحن لسه دابنا في القيف
نمشي وين ما شال الغمام
المنامة وجدة وجنيف
ما مهم وين يبقى المقام
المهم يا صاحي كيف؟؟
الحمام يدينا السلام
وينحسر مد النزيف
وبكرة برق القبلي لو شال
يبقى بركة وخير الخريف
غيمة لي حميد وقدال
وغيمة لي محجوب شريف
وكل طيب وود حلال
ما ولق بي ايدو في الزيف
وبرضو واجب سترة الحال
لو نزل في ساحتنا ضيف
من سبيط النخل الطوال
ومن طرف ساقيتنا عيش ريف
كمدة من حق العيال
للصغار في زمزم رغيف
لاااازم تقيف
