.الطائر الجريح : صلاح محمد عبد الدائم (شكوكو)

▪️احداث القصة حقيقية حدثت تفاصيلها في مدينة كسلا .
▪️بدأت القصة بعد نزوحنا من الخرطوم حيث عملت فى مشروع زراعى فى ولاية كسلا .
▪️كنا زارعين لينا مجموعة من الخضروات واهو مسترزقين منها والحمد لله .. والامور ماشه .
▪️مرات مرات كان بيجى يساعدنى ولد اخوى فى المشروع وهو أصلا طبيب بيطرى فقد شغله بسبب الحرب فى الخرطوم.
▪️المهم في يوم من الأيام فى المشروع لقيت لى طائر يشبه السمبرية .. وكان مصاب فى جناحه وواقع فى الارض .
▪️الطائر شكلة كده فى حيوان حاول يفترسه .. أو ارتطم ليه بحاجة واصيب .. قمت انا شلته معاى البيت وقلت أخلى ولد اخوى الدكتور ده يعالجه .. ولأنى اذا خليته هنا فى حيونات مفترسة ممكن تاكله .
▪️الغريب فى الموضوع إنى لاحظت فى ظهره يوجد جهاز تتبع (GPS) وفى رجله قطعة معدنية منحوت فيها اسم مركز ابحاث فى النرويج ورقم تلفونهم.
▪️ولد اخوى الطبيب البيطرى .. قال لى الطائر ده من الطيور المهاجرة والعابرة للقارات وده موسم التزاوج بتاعه بجى السودان هنا كل سنة مع موسم الخريف وبعدها يهاجر تانى ويرجع بلده .. فقام طوالى دخل النت وعمل بحث وعرف انه المركز ده فى مدينة روندِ على الساحل الغربي للنرويج، وعندهم مراكز كتيرة لمراقبة الطيور المهاجرة فى مدن مختلفة فى النرويج .
▪️الدكتور ولد اخوي اتواصل مع مركز الابحاث الرئيسي فى (النرويج _اوسلو) ورسل ليهم “أيميل” ووضح ليهم انه الطائر ده معنا وانه مصاب .. ومدى الاصابة البليغة الاتعرض ليها وشرح ليهم انه هو طبيب بيطرى وحالياً بعالج في الطائر .. واصبح بينهم فى تواصل شبه يومى ومراسلات بسألوا فيها عن صحة ومدى تحسن الطائر وكان برفع ليهم تقارير عن حالته الصحية لمركز الابحاث النرويجى ويرسل ليهم صور للطائر فى كل مرحلة علاجية .
▪️ اخيرا وصل الطائر مرحلة التشافى التام واطلقنا سراحه وطار وظهر عندهم فى الرصد بتاعهم بالاقمار الاصطناعية انه التحق ببقية سرب الطيور المهاجرة والمتوجه لاثيوبيا.
▪️مدير مركز الابحاث النروجي المتواصل مع ولد اخوى ده اعجبت بالجانب الانسانى لديه والعناية الطبية بتاعته والاهتمام والدور القام بيهو تجاه الطائر حتى تعافى.
▪️طلبوا منه انه يجى يشتغل معاهم فى مركز الابحاث لمراقبة الطيور فى النرويج وقالت ليه رسل لى شهاداتك وفعلاً رسل ليهم شهاداته الطبية وكانت كلها موثقة وجاهزة.
▪️سافر ولد اخوي بورتسودان ومن هناك رسلوا ليه حوالة مالية عن طريق (الوسترن يونيون) لتحويل الاموال واتوجه للقاهرة وكمل اجراءته هناك وحاليا سافر النرويج.
▪️شوف ربنا لما يسهل ليك امورك ويفتحها عليك بسبب طائر وحاجة بسيطة انت ماكنت متوقعا فى حياتك ويحصل ليك تغيير كامل فى مسار حياتك باكملها.
“سبحان الله العظيم مدبر الارزاق والامور”
.