سهير زكي تروى قصة غضب أم كلثوم عندما رقصت على موسيقى “أنت عمري “ومقلب الست لها !
سيدة الغناء العربي ام كلثوم كان حريصة جدا على أعمالها وجودتها لتخرج إلى المتلقي بشكلٍ رائع ومن المواقف والقصص التي تروى عنها أنها سمعت من الاستاذ محمد عبدالوهاب أن هناك راقصة ترقص على الحانها في احدى الملاهي الليلية فغضبت أم كلثوم وطلبت ايقاف ذلك وهذه القصة ترويها بطلتها الراقصة الكبيرة سهير زكي وتقول: كنت بشتغل في ملهى ليلي في مصر الجديدة و قدمت مرة رقصة على أغنية أنت عمري و كان حاضر الأستاذ محمد حسنين هيكل ، فوصل اللي حصل للأستاذ محمد عبدالوهاب و الست ام كلثوم ، فالست قالت للأستاذ عبدالوهاب ازاي كدا الموضوع ده لازم توقفه ازاي يعني راقصة ترقص على مزيكتي ؟
فالأستاذ عبدالوهاب سأل عني و حضر الملهى عشان يشوف اللي بعمله ، راح بعد ذلك للست قالها يا ست ده أنتي لو شوفتيها شئ مش ممكن ، بنت جميلة و ادائها راقي اوي ، فالست بخباثة شديدة تعمل ايه ؟
عملت حفلة و جابتني ، وأنا ما كنتش أعرف انها اللي عامله الحفلة ، و أحنا بنجهز لقيت اللي معايا بيقولوا ده الست أم كلثوم قاعدة برا ، انا قلبي وقع و ارتبكت و الموسيقين اللي معايا خافوا يعزفوا لحنها قدامها و كانت مشكلة ..
دخلت لقيتها قاعده في الهول امامي على طول .. بس ربنا سترها و تماسكنا و قدمنا عرض و طلع كويس الحمد لله ، روحت سلمت عليها و لقتها عاجبها الرقص و بتقولي انتي ازاي شاطرة كدا و ازاي حافظة اللحن كدا ده انا بقعد ٤ شهور أعمل بروفات عشان احفظ اللحن .
