. بنية من زمن الحلم !

.

. بنية من زمن الحلم
. حسن خالد حسين

يا جاية من جوف العدم…..
ياقاهرة لي كل الظروف….
وجاياني زي صوت النغم.
زي موية في جدول صغير
بي همة جارية على الجروف.
تسقي العروق …
تطفي السقم..
يا بنية من زمن الحلم
من بسمة الزمن الجميل.
زي فرحة من بعد الالم
جددتي أحلام من عدم..
*******************
انا من زمن راجيك كم .
راجيك من اول بواكير الخريف
في سكة العمر الطويلة..
وفي متاهات العدم
في الضل تحت شجرا وريف
عند الكنار…. في القنطرة.
عز الشمس والدنيا صيف .
مكان بلملم فيه أهات الألم
وأعطن على العشب الحزن.
لما النسيم يحرن يقيف
لما الصبر دونه العدم.
مكان بطمر بالتراب حزم الأسف…
وأتكل همومي على الوهم …
أبكي الدمع ..
تبكي الحروف…
حرقة وأسف .
وأرسم على ورق الشجر
قلبا موشح بالزهر
وأنقش حروف أسمك حرفا حرف
على اللحا ..في الساق وشم……..
أجمل أسم.
أسما مرصع بالقبل…
وسهما طويييل يلامس الجرف.
*********************
والليلة يوم جيتي ومعاك..
جايبالي في طرفك فرح
ماليالي في جيوبك عشم .
وعيون تفيض ضجة ومرح
أديني أرشف من هناك
خليني بي عينيك أشوف
قريني بين كفيك حروف
أنا ليك تلميذا سمح.
عبيلي من خديك قطوف
ضويلي في ليل السجم .
طولت راجيك يا الصبح.
*******************
يا بنية أخديلك نفس
أرتاحي من طول السهر
خشيني ما بين الضلوع
أدخلي لا جوة القليب..
تاكي الشبابيك والضلف .
أنجمي في داخل الغرف
خليها تفرح…. دي النفوس
شيليه من كتفيك خوف
أغسلي من وجهك تعب
زيليه لون داك الحزن.
يكفينا ما ضاع من عمر….
يكفينا غم .
***************
خليه يتحقق حلم
حلما مغطيه الزمان
حلما شهد ليه السيسبان
حلما شهد ليه السدر .
شلناه في لوز القطن
بين الترع شب وكبر
وسط القواقع والصدف
لكنه أتلاشى.. وودر
في غفلة توهته الظروف..
لكنه عاد …
لكنه ده اليوم …أنتصر .

حسن خالد حسين
٢٦ فبراير ٢٠٢٣ م .