ما تتجوغر وتمشى التراويح لأنه المحل زحمة والإستفراغ حيبشتن المحل.

تنبيهات رمضانية
*ما تتجوغر وتمشى التراويح لأنه المحل زحمة والإستفراغ حيبشتن المحل.
*ركز فى العدة الطلعت بيها الشارع عشان الحاجة ما تفقد أعصابها،مرة
نسيت لى مفراكة فى الركشة قبل سنتين لحد هسه لمن أتذكرها دمى بفور فالعدة دى فيها شئ مابراها.
* حاجة تحير إنه أكل رمضان عندنا بختلف ومعظم الشعوب ماشين فى اكلهم زاتو ملوخية بامية بطاطس ..يكون السبب حرارة الجو مثلا او العطش ؟ومنو الحدد الانواع دى بليلة..طعمية..قراصة او عصيدة ..حلو مر..وهيك.
*الماعون اللين غسيلو هين فالعدة تتغسل مباشرة بعد الفطور.
*إن شاء الله ناس الكهرباء ينسترو.
*ركز فى عباداتك وأنسى تصريحات الجماعة ومناقرتهم حينتهى رمضان وما حيفوتك شئ لأنه -حيسومقو ويردو- ودى عبارة بتقولها حبوبة اظن معناها انهم بكونو لافين صينية وحتحصلهم فى اللفة.
*هل تصدقوا إنى الليلة وأثناء برص فى حاجات فى التلاجة لقيت لى عقاب ملوحة ليها كم يوم ونزلتها واكلتها وبكرة رمضان متخيلين الطفاسة الحزينة دى؟غايتو الشاف لسانى برا من العطش ما كضب رغم إعتدال الجو.
*هو رمضان يعنى بكره بالجد؟