الاستاذ حسن عثمان الحسن يكتب ؛ لو كنت سوداني!! يا دقلو …واللِسِم جديد لنج علينا!
.لو كنت سوداني …كنت عرفت انو الخرطوم عندها اسيادا …لانك ما اتربيت في الديم ، ولا الصحافات …او العمارات …ولا في بري ،ولا في العباسية ،ولا في الكلاكلات ، ولا في امبدات، ولا شفت العشش -ديم القشاشة- و لا مريت بالختمية او الدناقلة ولاشميت الهوا في حلة حمد، ولا حلة خوجلي ، ولا الحاج يوسف ولا كحلت عيونك بالقباب عند العسيلات في العيلفون،،، وما سمعت ب غريقانة ، ولا ديم سلك ،ولا ديم الجوامعة..ديم سعد ..ديم زبير …وديم كارا … ولا مشيت عصرية في ديم التعايشة ولا ديم برتي، ولا حي العمدة ،ولا حي العرب …إنتا بتعرف سوق الشجرة …حي المظاهر …والكبجاب …الم تسمع سيف الدين الدسوقي… يغني له!؟!
لم تسمع بالمايقوما ولا السجانة ولا الحلة الجديدة ولا الدخينات…
…يا حليلك يا “دلاقينو” …ما خشيت معانا حديقة الحيوان…الشالا علي عثمان محمد طه !!!
ولا شربت معانا “لبن كافوري “…الشالا ” بشة ود هدية وحولا لى ود بانقا الجديدة ”
يا حليلك يا ” دلاقينو” انت الخرطوم بتعرف ليها شنو…!!!؟؟لم تحضر حفلات عثمان حسين ولم تسمع بحسن عطية،، لم يعالجك دكتور ادهم!! ولا لويس عبده… لم تتذوق عيش سيحة… ولو ” سعلوك يا دلاقينو وين مقابر اليهود…وين حي باريس” …وشارع كاتارينا …ومدارس اليونيتي واولاد عبدون …. ووليام اندريا….والنادي الكاثوليكي .تقعد تفنجط ساكت ….!!!
….يا ” دلاقينو” انت لم تجلس في اتني …ما انتظرت الباص في محطة الغالي …والشجرات …ولا نزلت من البص الهنغاري …في محطة عشرة دقايق …ولم تسمع بالمحطة الوسطي ولم يزاملك احد في خلاوي الخرطوم او مدارسها….يا دقلو هل تغبرت كراعينك ” فرِد يوم ” وانت في المولد ….ووين !!؟…في ميدان عبد المنعم ….كيييييييف يازول تجدِع كلامك زي ما دايِر ….
الخرطوم بي اهلها …الخرطوم بى ناسا!!!
الم تسمع بالملاكم لوكا اشول ، ولا مصطفي سيمكا ، ولاود الاقرع ،ولا حيدر…..الم تسمع بالبطل يسن خالد في رفع الاثقال ، ولا الحاج منقزا ،ولا محمد وشو ،ولا ادم محمد عبدالله …
الم تسمع بال كيتا في الخرطوم ، لا حاج قدس ،ولا فنان الجاز عمر عبده ،ولا سليمان ابو زيد ولا اكلت وجبة فول في كشك عم قسم الله ….ولا ” ختن ” عمنا الكناني في مركز صحي المايقوما …!!!
…هل في يوم دقشك” الكضمي بوكس” وانت خاشي ” تسري منزل ” في كلوزيوم!!؟
هو أصلاً نوعك دا بيعرف ” كلوزيوم ” دي جضعه..وَلَّه بنت لبون …رشاش وَلَّه دبابه !؟
جايييي الخرطوم تعمل فيها شنو يا دقلو!!؟
…بتعرف واحد إسموالهادي الضلالي ولا كمال افرو …بتعرف عمك باب الله…عمك سييك…عندك واحد من جماعتك ..القتلة ديل…لعب كورة في ميدان عقرب…فيكم واحد عارف انو السودان شال كاس افريقيا سنة كم …ومين سجل اهدافنا..!!؟؟
عندك واحد مدفون في ترب بلاع وَلَّه فاروق
فيكم واحد شِرِب أبو رحض، او بيرة ابوجمل…وضرب بعديها اتنين تلاته سندوتش فول ابوالعباس!!!
…وكمان تسأل الخرطوم ” حقت ابو منو فيكم”
يا راجِل واللهي إنتا حِتة انتيكة..ونكتة!!؟؟
هههههههه
تخيل زول عواليق …وضابط ” مفبرك” زي دا يقول ” الخرطوم ما عندها سيد”!!!!
شوف يا زول اي حتة في البلد بي اسيادا واهلها وعمدها ومشايخها وثقافتها وشللها وناساتا….لا كين انتو يا ناس دقلو طارييين …جديدين على البلد دي…جايين من ورا الصحاري ،والعتامير ،والمفازات ،والمغارات ،والمتاهات…من ورا الحدود…جابكم الفقر والجفاف والتصحر من فيافي تشاد والنيجر، وصياصي ديار شنقيط والكاميرون…
الخرطوم لا هوووولكم ولا بتشبهكم!!
….نعم لم تري او تعايش احد من ظرفاء الخرطوم،،، هولاء كلهم فسيفساء سودانية مية المية ،،، فور ، وبرتي ،وبرنو، وبرقد، وطاويط …نوبة ، وتاما، تنجر وداجو ومساليت ،وبقارة وشايقية، و جعليين، مواصير ، ودبنكا ،وشلك، ونوير ، ووازا ، سكوت ومحس وحلفاويبن ودناقلة وبشاريين ، وبطاحين وشكرية، وفلاتة وركابية ،وبديرية ورباطاب وشنابلة…يمانية.. اقباط ..ويهود …وحبش ..طليان واغاريق….( وقادمين جدد وهم مسالمبن يلتمسون الامان والحياة الكريمة ، بلا اسلحة يحملونها ،وبلا صحائف اجرامية لا، لا او قضايا تطاردهم …..
هؤلاء هم اسياد الخرطوم،، الخرطوم محروسة بى ناسها ولن ينال منها احد ولم توصد ابوابها في وجه احد،،،الخرطوم عصية علي التركبع ايها التشادي،، انت لست …منا ونحن لانتشرف بوجودك بيننا !!
ولو لاالخيانة …خيانة الكيزان ومشروع الفطيس الجيفة حسن الترابي وسيناريوهات وخباثات الجبهة القومية الاسلامية … ولولا مخطط بشة ود هدية ” حميدتي ..حمايتي”…..لما كنت هنا…تتضرع في الخرطوم….وتتساءل بأعلى ما عندك من صوت
الخرطوم” حقت منو..؟!”
يا ” دقلو ” ارعي بي قيدك….!!
الخرطوم بى اهلها
الخرطوم بى ناسا
وهم من انجزوا ثورات اكتوبر..ابريل
وعروس الثورات في ديسمبر / ابريل
” ارعي في قيدك يا دقلو”
حسن عثمان الحسن
