هلال السودان يتحدى الغربان !

لقاء وليس كل اللقاءات مباراة لا تشبه سابق المواجهات جولة وليست كل الجولات ومعركة تختلف من كل المعارك السابقة يدخلها هلال السودان وعينه فقط فى شباك الغربان من أجل حسم وأحدة من أهم المباريات التى يخوضها عملاق السودان فى دورى المجموعات فالفوز فيها يضع الفريق فى الطريق الصحيح وهذا الذى ينشده ويرنوا إليه فارس السودان .
(الغربان تعودت أن تنال العلقة الساخنة دائما فى أم درمان ولكن المكان ماعاد ذلك المكان بفعل جور الزمان الذى قسى على السودان ولكن حتما سنعود ومن موريتانيا سنجود ونسود.
(هلالنا الليلة (غير) ياغربان فريق مختلف فى كل شي لاعبين مميزين وجهاز فنى منتظر شارة البداية ليعكر مزاج مازيمبى مدرب تعرفونه ويعرفكم ويكفى أنه فلوران السودان وياويلكم ياغربان.
(الهلال ماعاد ذلك الفريق الذى تتأمرون عليه فى لوممباشى وتفعلون معه كل شي فقد إستفاد من التجارب والكل أصبح فيه محارب كارب كادر وطنى متمرس فى القتال وأجانب لايعرفون المحال وضعوا الهلال فى قمة التلال فأصبح آية من الجمال منارة سامقة يقودها الغربال.
(هلالنا (غير) يامازيمبى عرين فى حماة فيل إيفوارى ودفاع أقوى من القلاع طيب وعثمان وأيبويلا وخاديم وكمان إيرنق وميندى مافى حد بعدى.
(هلالنا (غير ) يالكنغولى وفى موريتانيا أصبح حاجة تانية وسط خيالى خلطة سحرية سودانية سنغالية موريتانية جاهزة مية المية بوغبا وروؤفا وقاسوما وماديكى وإيمى وسط صاح بقيادة صلاح .
(هلالنا (غير) يالغربان وعملاق السودان أصبح هجومه يتغزل فيه (الأفريكان) من كثرة جمال الأقوان فيه الجان الفنان ومحمد عبدالرحمن والكاسر الشاطر ياسر وكوليبالى وهذا الأخير يفلق ويداوي ويضرب ولايبالى وأهدافه تاتى بالملى والثوانى.
(كن فى يومك كماعهدناك يافلوران أدرس الميدان وأدفع بالمحاربين الشجعان و جهز البدائل لسد ثغرات الحال المائل وإستمتع بأجمل الأقوان وتوج نفسك قمرا ساطعا فى ليلة سقوط الغربان وأرسل الفرح للسودان.
( حبابكم أشقائنا بموريتانيا شيخ بيديا يناديكم والهلال هلالكم وفى إنتظاركم إنطلقوا من ضواحى نواذيبو ومن أطراف كيهيدى ومن قلب النعمة إجتمعوا فى نواكشوط فهلالنا بيكم مبسوط وجاهز لكتابة الخطوط والدخول مجان ياحبان للإستمتاع بليلة سقوط الغربان وشكرا يا إدارة وقراراتك دائما رشيدة وسديدة وليلتنا أكيد سعيدة.
(سطروا الملحمة يا أبطال فأنتم نعم الرجال لقاء يحتاج لتركيز وهدؤ شديد وحذر وأجب ومراقبة لصيقة لمفاتيح اللعب والتصدى لكل الهجمات المرتدة السريعة للكنغوليين فالبداية السليمة تقودنا للنهاية المفرحة حذارى من التدخلات العنيفة وملاحقة الحكم المصرى محمد أمين لأننا (أخوات) وركزوا على الكفر وشدوا الوتر هاجموا بضراوة ودافعوا ببسالة وستصل الرسالة وياهلال الجسارة لن نقبل الخسارة و راجي منك بس إشارة وفوز يدينا البشارة ويمنحنا الصدارة.

أخر الأصداء
موج هدر ..تاريخ ندر..إسمو الهلال.