الناس .. في كسلا .. الي روح صديقي الشاعر عزمي احمد خليل .. العاشق لكسلا .. عليه الرحمه … ع . هلاوي

وانا في كسلا ..
اتمنيتك عزمي معايا ..
عارفك رحتا هناك ..
لي ربك ..
ونحن في دربك ..
بس اتمنيتك لحظه
معايا ..
تشوف كيف كسلا
شوارع كسلا ..
وبنوت كسلا .. الكانو
حكايه ..
كبرت كسلا .. الناس في كسلا ..
وكبرو حبايبي ..
الكانو معايا
اريتك
اريتك كنت يا عزمي معاي

شفت الناس الكان
بنريدهم
وكنت زمان في قبضة
أيديهم ..
نداوه .. حلاوه
وبهجة منظر ..
هسه الحال يا عزمي
اتغير ..
وهسه السكري .. بدل السكر ..
حتي الكان بتكسر فينا
اليوم يا حليلا ..
مشيها
مكسر ..
اتغيرنا .. الزمن اتغير ..
والله مخير …….

واريت لو شفت يا عزمي
هنايا ..
السلمتا لي حسنها امرك
وكاتب شعرك ..
الف حكايه ..
والف روايه ..
دي النضاره .. قعر كبايه
كبرت كسلا ..
وناسنا في كسلا ..
ونحن خلاص .. ماشين لي نهايه …

شفت فلانه اللون الخمري
ضحك القمره
وصوت القمري
لما تشوفا العسل يتقطر ..
حلاة التوب الفيها مشجر ..
هسه ( بولستر ) ..
يا سبحان الله يا عزمي ..
حاجه تخلي الزول
يتحير ..
مشي يا الله ..
قعاد يا الله .. والله يا عزمي في خلقو مخير
وكلو مقدر …

شفت نقط..في نقط ..
يا عزمي ..
ولما تشوفا الكون
يتعطر ..
ولا بتتصور ..
شابت .. وشاب القاش في كسلا ..
ده نفس القاش
العامل عنتر ..
واه لو شفت الناس في كسلا
كبرت كسلا ..
الناس في كسلا ..
وبنوت كسلا ..
وكلو في كلو يا عزمي
مقدر ..
وكلو نهايه .. وليها نهايه
واريت ..
اريت لو شفتا الناس في
كسلا ..
وبنوت كسلا .. الكانو حكايه ..
كلو في كلو .. دي اية الله ..
وكل نهايه .. وليها نهايه ..

عبدالوهاب هلاوي