كاِستراحة مؤلمة،تعكس محنتنا..
*الرسالة*
*مرة جاني واحد عندهم زول كبير في الحِلة مات ..من خلال كلامو
،حسيت إنو (المرحوم)
زول كانت ليهو شنة ورنة زمان في منطقتهم ..!.
*قال لي دايرين نعمل ليهو (نعي أليم)في الجريدة.. بيكلف كم؟..
# قلت ليهو مجان..
**قال لي :خلاص عليك الله أعمل لينا ليهو*
*(نعي يكون جميل كده)*..!.
# قلت ليهو؛ كيف (نعي جميل) !!؟؟؟..النعي بيبدأ ب(وبشر الصابرين ) .. وبنتهي ب(إنا لله وإنا إليه راجعون)…
وأضفت:النعي نعي ..ما في نعي جميل ،ونعي ما جميل..!.
**قال لي : والله يا أستاذ المرحوم ده زول ما كان ساهل ..لازم تعزو (بنعي) جميل.*..!.
#وصراحة أنا كنت زهجان وعمك (لايوق) جداً ..قلت ليهو دقيقة طيب..!.
جبت ورقة وكتبت :
*(على حُمرة الوردة*
*وحُب الندى الرقاش*..
*غافل وما عارف*
*إنو الزمن غشاش*..
*بالله ليه يا فراش*..
*خلاك وراح القاش*..
(!)وأضفت:الأهل بمنطقة كذا ريفي كذا يتقدمون بالتعازي القلبية الصادقة لفلان الفلاني، الذى لبى نداء ربه إثر علة لم تمهله طويلاً ….. الخ)*
**عمك صلح طاقيته، وقال لي :ينصر دينك ذاتو ..بس ياهو كده.*..!
*كسرة 😗
*نحن الآن في السودان ما متنا لكن بحاجة إلى*
*(نعي أليم وجميل)*
*حتى وإن كان*
*برائعة ود اللمين 😗
*مصيرك بكرة تتعلم..*
*وتعرف كيف يكون الريد*
*وليه الناس بتتألم…*
محمد الطيب لأمين
……………………………
*التعليق*
هذه الرسالة المُعبرة أكتبها للقونة (رترته)..
ولندى..
ولكلِّ أُمراء الحرب،هنا وهناك..!.
ولقائد جنوب الحزام المُفترض..
ولزوجته البنت القاصر (الحُبلى)..!.
وأنا مُحتار لمن يقوم القائد ينكح ،،على أصوات الرصاص..والشهداء وآنات المُعذبين والمُشردين والنازحين واللاجئين..!.
اللهم سلط على الظالمين ظالمين..!.
دا جاتو رغبة من وين..؟!.
يقننا الذي لا يغشاه الشك،أنَّ (كيزان السجم) سينالون عقابهم في الدنيا قبل الآخرة.
اللهم إنهم قد مارسوا عبر نظامهم المؤول كلَّ صنوف الفساد..
وصنعوا الدعم السريع..
وأشعلوا الحرب..!:
اللهم لا تحقق لهم غاية..
ولا ترفع لها راية..
واِجعلهم للبرية عِبرة وآية..
وأخرِج وطننا منهم سالماً أمٍناً،يا رب العالمين.
………………………….
**عادل سيدأحمد.*
*رئيس تحرير وكاتب سوداني*.
