استاذن الشاعر الحصيف الاستاذ الشريف باعادة النشر لتعميم الفائدة..

استاذن الشاعر الحصيف الاستاذ الشريف باعادة النشر لتعميم الفائدة.. مع جزيل الشكر له..
كتب الشقيق/ الشريف الحامدابي.
إنتَ يا الشايِل سِلاحك
دار تكاتِل شان شِنُو ؟
وحين تهلِّل أو تكبِّر
دار تجاهِد في مِنُو ؟

انت كان ساند العساكِر
هل تُراب وطنَك حَمُو ؟
وياتو حُكماً جابو شعبنا
هم ما انقلَبو ورمُو ؟
الجيش ده كان ميلادو واحد
وهم سيَّسُو قسَّمُو !
كان هو قوات شعب واحد
وبرضو ماكان برحمو !
والبطالب بي حقوقو
بقيفو ضدو ويظلِمُو !
والفي رأسُو الليلة شايف
هُمَّ جاهزين يخدِمُو ؟!
وهل كلام إصلاحنا ليهم
إنتَ شايف بفهمُو ؟!

إنتَ كان ساند المليشي
قولي مين الأنجبُو ؟
هل بتعرِف كيف بدايتُو
وكيف على الموت درّبو ؟
واللِربُُوا وقوُّوا عودو
وبالقوانين حجَّبو
من بعد كان دعمِ ليهُم
ليه أبوهو وحاربو ؟
وألّا ساكِت إنتَ داخِل
بين ولد فاسد وأبو ؟

إنت ليه دايرنِي أدعم
منهج الناس الصغار ؟
مين اللقالك مافي أصلاً
تاني غير ( البَل ) خِيار ؟
للحرب كُنا بننبِّه
وكنا شايفين الشرار
لو كان فهمت كلامنا صاح
ماكان بيكبر ويبقى نار
ماكان بجهلك تستخف
من منهج السَاسَه الكبار ..

لو أصلو ما قامت حرِب
هل كان طريق ثورتنا ضَار ؟
هل كان فَقَد ساكِن الفريق
قيمة التعايش والجوار ؟
هل كان تشوف الإغتصاب
والنهبِ والموت والدمار ؟
هل كان تشوف حجم النزوح
والسَرقَة في وضَح النهار ؟
ده غباكَه هو الخلَّاك وقود
لي حربِ مافيها إنتصار
خلَّاك تشوف موت الوطن
عِندَك أهمَّ من الحِوار ..

مدنية الجبهة العريضة
الدار تضمِّد للجراح
الدار تواصل للمسار
في بالك إنت ده ماضي راح ؟!

بي قوة السلميَّة موش
نحنا إنتصرنا على السلاح ؟
وحقَّقنا أعظم ثورة موش
صِبحت نموذج للنجاح ؟
وساعين نكمّل للسلام
شان ننصِف الدم اللِرَاح ؟
شان الوطن يشفَى وكمان
من الحُروب يبقى استراح ؟
معقول بعد هذا النِضال
بعد المقاومة والكفاح ..
نرجع نشوف درب الحرِب
لعمَار بلدنا سليم وصاح ؟
معقول بحُبَّنا للوطن
ما بنلقى تاني طريق متاح ؟!

كل الطُرُق مافيها خير
لو ما بتوصِّل لإتفاق
ما بتنفع الحرب الوطن
بطِّل شِعارات النِفاق
وقف الحرب ساس السلام
نُقطتنا عند الإنطلاق
حلم البخاف حرب الأهل
حلم البصون دم الرِفاق
حلم المسافِر بالغصِب
وبيعاني من نار الفُرَاق
حلم اللِقاعِد بالجبٌر
ودرب المعيشة عليهو ضَاق
حادي البيبحثوا عن حقوق
في طريق عدالة طويل وشَاق ..

عارفين كمان عشم الفلول
في روحنا يشتد الخِناق
عشم البيصطاد في العَكَار
ما يلقى أمنِ وطنِّا رَاق
ما يلقى حيل الثورة غير
ساكِن في أعماق الغرَاق
نِحنَا اللِفي إيدنا الحُلول
يانا البنكتوِي بالحرَاق
شان ننقذ الوطن العزيز
داخلين معاكم في سِبَاق ..
*الشريف الحامدابي*