الشعب السودانى ؟ تتخيل في ناس ماتو في الخرطوم عشان انت مغلي اسعار الايجار في الولايات بتصوم وبتصلي عشان منو!؟؟! / بقلم عبد الله مكي
الشعب السودانى ؟
تتخيل في ناس ماتو في الخرطوم عشان انت مغلي اسعار الايجار في الولايات
بتصوم وبتصلي عشان منو!؟؟!
بالواضح كدا ما بالدس..
شفت في تركيا لامن جاهم الزلزال بتاعين البقالات بفتحو بقالاتهم ويوزعوا للناس مواد تموينية مجان
شفت في المغرب لامن جاهم الزلزال الناس مشت بالملايين تساعد في رفع الانقاض وتبرعوا بكميات كبيره من المواد التموينية لدرجة ان المغرب اعتذرت لكثير من الدول اللي عرضت المساعدة لان الشعب وقف مع بعض..
التلفزيون الليبي يقول هناك اكتر من ٥٠ الف عربية جات محملة بالمواد الغذائية والشباب لمدينة درنة المنكوبة للمساعدة وتقديم يد العون..
وشفت شعب كدا شغال ينفخ في نفسه :
لو ما جيت من زى ديل وا اسفاي وا ذلي
والبقع بيناتنا بنسندوا
الشعب دا لامن جاتو كارثة الحرب
الصابونة بقت ب٥ الف..واصحاب الترحيل نقلوا نساء واطفال من الخرطوم لامدرمان بسعر اعلي من العادى بمعدل مليون في المية والولايات الطرفية اللي نزح ليها بعض افراد الشعب دا اجرو ليهم بيوت الطين بإيجار شهري يعادل ضعف قيمة البيت لو حبيت تشتريهو في الايام العادية وشفت الجار قاعد يسرق جاره..والجار قاعد يبلغ عن جاره ليقبض ثمن التبليغ …
والعجيب ان الشعب دا قاعد يتسأءل وبراءة الاطفال في عينيه:
نحنا ليه البلاد من حولنا بتتقدم ونحنا متأخرين ومن مصيبة لكارثة ومن كارثة لكارثة اكبر..تخيل يا مسلم انهم عاملين نفسهم ما عارفين ليه المصايب جايهم واحدة ورا التانية…
سؤال
حصل سمعتوا في سوريا او اليمن او ليبيا ورغم سنوات الحرب الطويله عندهم بمواطن اول ما شاف جاره مافي مشي سرق ليهو بيته…
في السودان حصل يا افندم
وازيدكم من الزفت بيت
مش الجيران بس اللي سرقوا جيرانهم الاهل كمان سرقوا بعض الولد سرق بيت خالته وعمته….
ديل انحنا اللي بنقول مافي زول احسن مننا ونحنا الناس السودان أكرم ناس علي فكرة الكرم والاحسان البنقولو عننا في ساعات الخير جات الحرب وأثبتت انو كلام ذائف
والحصل فى مصر براهو كوم تصدير القيم المتردية الناس المقتدرة مشت ومعاهم السماسرة غلوا الإيجارات وفتحو مدارس سودانيةخاصة بأرقام فلكية مع انو المصريين وافقوا باستيعاب السودانيين مجانى فى مدارسهم دى يقولو عليها شنو ؟
انا نفسي المنشور دا يوصل لكل سوداني وسودانيه ونعترف بحقيقتنا ونصحي ضميرنا النائم دا لو بقي عندنا ضمير .
