مو علي فنان ” الراب ” الذي رفض اتحاد الفنانين اجازة صوته وسطع نجمه في هولندا

قصتي مع اتحاد المهن الموسيقية في السودان
بتذكر في نهاية ٢٠١٤ طلعو قرار انو اي فنان عشان يغني في الحفلات لازم يكون عندو بطاقة اتحاد المهن وعشان يحصل على البطاقة دي حيعرض على لجنة اجازة صوت واللجنة دي فيها فنانين كبار وهم البقررو اذا بدوهو تصريح يمارس مهنة الغناء او لا
حتى بتذكر كان بهاجموا الفنانين والموسيقين في حفلاتهم،
المهم انا قدمت على اساس اتحصل على البطاقة وما اتعطل من الحفلات
طبعا كنت متطمن جدا وزي ما بقولو زي “شربة موية” اني حا اتحصل على البطاقة دي

جهزت جيتاري والحاجات الطلبوها وقلت بسم الله واتجهت على الاتحاد
المهم خشيت وعاينته يميني وشمالي لقيت زي ٧ او ٨ من الفنانين الكبار المعروفين في السودان ( ما حابي اذكر اسمائهم احتراما ليهم)
المهم سلمت وقالو لي اقعد في هنا
طلبو مني انو اديهم السي دي اللي فيهو الاغاني حقتي
المهم شغلو السي دي على اساس يسمعو التسجيلات
طبعا اول ما شغلو المزيكة انا كنت في اللحظة ديك بحاول أقرأ الوجوه من تعابيرها
ولو وصفت ليكم كيف كان وشووشهم ما حتصدقو والله
شفتو لما العسكري يقبضك، في اللحظة ديك لا بتعرفو مبتسم او حزين حابيك او كارهك
المهم قبل ما يفتحو خشمهم عرفت الفيها

سمعو زي ٤ او ٥ اغاني ووقفو السي دي وطلبو مني اغني ليهم بالجيتار
غنيت اغاني خاصة بتذكر زي غنيتين او ٣
دار بيناتنا حوار طويل وكان بسألو كل فنان في اللجنة “اها رايك شنو”
حذكر ليكم رد واحد للفنان الكبير فلان الفلاني  قال (انا بي صراحة ما فاهم اي شي )
وفي النهاية طلعت من الصالة بكمية من الحزن
لكن الحزن دا ما خلاني احبط بالعكس اداني كمية من الايجابية وجواي كنت بقول في يوم حيتذكرو انهم حاولوا يوقفو و يعرقلوا زول همو الاول انو يقدم بلدو السودان

القصة ما خلصت وعشان تشوفو انو ربنا عادل وما بخلي حق زول يمشي ساي
الناس ديل بعد ما رفضوني بعدها بي كم شهر جاتني الدعوة من الفرقة الهولندية Rootsriders
واختاروني اكون المغني الرئيسي لي فرقتهم
لكن عارفين الحصل شنو ؟
ما حتصدقوا !!!
وانا في هولندا جاتني دعوة من السفارة السودانية انو اغني في برنامج واتخيلو الدعوة من منو ؟

اتخيلو معاي هم زاتم الرفضوني قدمو لي دعوة اجي
اغني معاهم
في نهاية القصة بحمد الله وفخور جدا اني ما استسلمت بعد الموقف دا