جنس عفوية …..

الايات القرانية والاحاديث التى تحتم عليك الاستئذان قبل الدخول وتنبيه الناس قبل ان تطل عليهم بطلعتك البهية كثيرة ولكننا نتصرف بعفوية عجيبة ومحيرةوما شغالين بيها الشغلة…..مثل انقشاط صديقتى المصابة بالسكرى فى حمام موجود فى حوش ناس لتفاجا بعد خروجها بانهم عزابة ….وكمان حبش ….الحمد لله الما بنغالة بعدالغزو الاجنبى المخيف للسودان….سبحان الله مع الحال المايل دا مازلنا مقصد الغير.
لا زال البعض بى فوق الحيطة ومع صباحات الله ينادى وقبل ان يصل للباب ومعها شبة ونقزة:-ابو حميد…..عمر ….عطا …والاسماء القصيرة كمان مساعدة وتعجبك….لا فاضى فى مرا قايمة من النوم نافشة نيشا ولا بقية المناظر العجيبة ديك بالنسبة للنايمين فى الحوش.
تجيك جارتك التى اشتهرت بالدروشة تووووووشك بعد ان جرت السلكة :-عاينى يا هناية دايرة لى قلم كحل….اصبحتو كيف؟!.. فيتقلب ابنك الممدد وطويل منزعجا فتقوديها من يدها بشيش للداخل فتقول معتذرة:-معليش والله علا ما لقيت قلمى ، قت كيفن امشى بعيونى مظلطة للخدار!!.
او تلك الاخرى التى تدخل بنفس الطريقة او ربما تستعمل حجرا فى الطرق اذا لقت لسة السلكة ما ركبوها لسة ….والله الحجر دا مفروض تصاغ ليه مادة فى القانون عديييل كدا فكم سبب صداع قوى لزول كان النوم قد بدأ يداعب اجفانه…او خلع ليه زول كبير فى السن وتسبب فى سقوطه…. اها… وتجيك غير عابئه باى شئ سوى مشكلتها:-اتصلى لى بناس الترحيل حق حمودى ….صبح محموم.
ثالثة الاثافى هى ان يدخل رجل (كش)لسيدة تتعاطى الدخان او تتحنن …..الخ .وكمان يصر يمد يده للسلام…..والله العظيم حصلت ….ههههههه او يقتحم غرفة تغيير ملابس فى بيت عرس والناس ماشة النادى وما ادراك ما يحدث فيها من هرج ومرج…ولكنه غالبا بكون من فئة الهطلات ورغم ذلك يثير استيائهن .والامثلة كثيرة.