الأعمدة

مطلوب شباب وشابات لوظائف -هبابين-

-أن يكون المتقدم للوظيفة فى عمر بين 17-30(ممكن يقيف على حيلو 8 ساعات على الاقل).
-أن يكون بصحة جيدة جدا وعافيتو شايلاه
-شهادة تطعيم الكورنا وجدرى القرود واى جائحة او كبة جايانا أومتوقع إختراعها.
-طويل البال يتحمل صراخ الاطفال ونضمى كبار السن وملاغاتهم وممكن يساعد فى مناولة كباية الموية والمناديل وسبت القمامة للتفاف بمؤاخذة وممكن يطردك لانه زهج منك فتمرق شوية وتجى راجع.
-تكون النظافة لديه عادة لأنو حتقيف فى رأس الزول استحمام ومزيل عرق اهم حاجة.
-انت وشطارتك لو بتهبب بتقنية معينة ممكن ترتاح لانه البرودة بتكون مستمرة.
-الاجر بالساعة وبسعر كيلو الكهرباء ومع جبريل دا تتوقع زيادات طوالى.
-تكون مستعدا لتلبية النداء فى اى وقت وهنا تكمن صعوبة المسألة فمع الخرمجة حقت ناس الكهرباء ممكن ينادوك 3 ص او 12 ليلا او 6 مع المغرب وعليه يجب ان تختار مناظق قريبة تتمشى كدارى …او مناطق كهربتها بتقطع فى اوقات مناسبة او ان تكون مقيما يعنى تجيب غياراتك وتقعد مع الناس عدييييل …. وبالمناسبة صحى الحقارة دى سببها شنو وناس بتقطع نص الليل وناس فى اوقات معقولة؟!!!
-الفئة المستهدفة مواليد…كبار سن….مرضى ملازمين السرير …نفساوات….ناس من فئة اكس اكس اكس لارج..والمجبصين ….ناس الازمة .
– الامتيازات:الافطار ،الماء البارد،المواصلات
-ممنوع الغش لأنه فى ناس من اول (هبة)حيشخرو فتخليك امين وبتهبب.
# ليه يقولو البلد دى مافيها شغل؟

مقالات ذات صلة

زر الذهاب إلى الأعلى