كلمات في رحاب الوطن

.

المني جرحك يا وطن
وانت بتئن ليك كم وكم !!
زايدين ولادك فيك وجع
رادمين عليك كل الهموم
ماليين لياليك شجن…
زايدنك محن .
وأنت ما ياك الصبور
أنت ما ياك الجسور
صابرعلى همك سنين
كاتم الألم
ضاغط على جرحك زمن .
*******************
ما بنخليك وحدك براك
ولا بنسيبك في الألم
ولا في يوم ترابك يستباح
ما لسه في ولادك عشم
يحموك بصدورهم يجوك
فرسان تقاتل شان هناك
فرسان تضحي عشان رضاك
وحسان تزغرد يوم حماك .
بثيابن يقتقتن المحن .
ما بتبقى يوم وحدك براك
ولا بخلوك هم تنهزم .
ما أنت عندنا ياك الكبير
ما أنت أهلنا والمصير
فيك الملاذ
عز الشتاء
ومن الهجير .
يوم ما الدروب تتقفل.
وين تاني غير دربك نسير .
****************
سامح ولادك كلهم
هم غلطوا في حقك كتير
جيبهم على حضنك معاك ….
ليك لمهم .
كم تاهوا ما بين الجبال
كم نزحوا لي بلد السجم .
شالوا السلاح في أقتتال
كتلوا الأخو كتلو القريب
ما خلو خال ما خلو عم .
سقوا الارض ..
ما سقوها المي ….
سقوها دم .
وانت بتئن يا وطن..
ليك كم وكم .
ما بان لك الزول الرشيد .
ما عرفوا لرجالك لمم .
**************
ح يجيك وليد مليان فهم
ح يجيك وليد مليان حكم
يمسك بايدك يرفعك
لي أعلى فوق في القمم .
شان تبقى امن مستقر .
في العهد الجديد …
لعزك يعيد
لعرضك.يزود .
ما بيرضى أنك يوم تهان
أو حتى في يوم تزم .
علشان عزة في عزك تعيش .
قريرة في خير الوطن
علشان نوره في ضلك تجم .
ما يغشى عينيها الحزن .
علشان نعيمه مع العيال
بيضروا في العيش والدخن .
ح يجيك وليد شبهك تمام
ح يجيك وليد عالي الهمم.

حسن خالد حسين .
يناير ٢٠٢٣ م.