الكوع والبوع

أستعمل الأنسان كل أعضاء جسمه فى ضرب الأمثال وصوغ الحكم وأحيانا فى وصف حالة الغضب والسخط من الآخر، حتى أعضاءه الداخلية لم تسلم من ذلك ، مثلا يقال للشخص الذى لا يحسن التصرف فلان ما عنده راس، ولمن تحير راسو ضرب ، ومخه زنخ ودا بليد شديد ، أما الشعر فيقال لمن لا يتقيد بقيم المجتمع المتعارف عليها ( ماشى على حل شعره ) ، وأنت نازل (العين ما بتعلا على الحاجب )ودموع التماسيح ،وجانا والشرر يتطاير من عينيه ، ورافع نخرتو ، وأخلاقه فى راس نخرتو ، ومنفخ جضومو نسبة للزعل ، والعندو شفاتين يقدر عليها وأمسك خشمك ، وخشمو خفيف ، زول لسانو طويل،وحلو لسان
وقليل إحسان ، وأب سنينة يضحك على أب سنينتين ،ومولود بى سنونه ، وعمل لينا وجع وش ، ووشو يلعن قفاه ، وجانا حانف وشو ،وأمسحوها لينا فى وشنا ، واحلق شنبى ، مسكا دقنو ،ولما تشوف حلمة ودنك ، صارى وشو ، تعالوا ننزل للرقبة ولكن قبلها يقال مثلا حمل المسئولية على عاتقه وقيل أن العاتق المنطقة ما بين المنكب والعنق والمنكب ذاتو مجتمع رأس العضد والكتف ،وأوع تقولوا لى العضد ما عارفنو ! وكما قلت لكم أن ( الذمة ) وهى قيمة معنوية ولكن السودانيون يعرفون موقعها فى الجسم ، وهى الحفرة مكان التقاء عظم الترقوة، اها ننزل للرقبة فنقول الزول دا بقى لينا فى
رقبتنا ،ورقبتى سدادة، الكتوف اتلاحقت ، الشايل ليه قربة بتخر على ضهرو، وعندو ضهر بمعنى لديه من يسنده ، دق سدرو وأتسدر للمشكلة والزمن دا ما فى زول قاعد يدق سدرو نتيجة للخوف وقلة المروة ،ما عارف كوعو من بوعو ، والكوع أطول عظمة فى ابهام اليد والبوع عظمة فى ابهام القدم ويضرب المثل دلالة على الجهل ، وطلبو يد بتنا ، وايدو لاحقة وايدو خفيفة، والضمير خاتم ويقصد الخصر وهو المنطقة ما بين القفص الصدرى والوركين ، وام كلو دى ، للبنت الما عندها خصر ، وان شاء الله يعرس ركبيك ودى دعوة ما عارفة المقصود بتعريس الركب شنو ، وركبو ساحت من الخوف ودى
بتحصل نتيجة للخوف الشديد ، واذكر أن ركبى ساحت فى الثانوى أثر نهرة مفاجئة من مدير المدرسة فى اول السنة وكانت أرتدى فستان المدرسة بدون البنطلون الذى لم يفلح الترزى فى تجهيزه فى حينه ، ولازال الشعور نفسه ينتابنى عند تذكر تلك النهرة القوية من مدير ملو هدومو أشتهر بالحزم الشديد .
القدم ليه رافع ، كراعو حارة ، الضفر ما بطلع من اللحم ، البت ام عراقيب دى ، والعرقوب وتر غليط فوق عقب القدم ، وقيل أن الفنانة نانسى عجرم أستطاعت معالجته بواسطة النفخ ( عشان تبقوا عارفين ) ، شعرت جلدى كلبت، وزول جلده رهيف حساس وجلده تخين العكس تماما ، اما الاعضاء الداخلية فنقول مثلا الزول دا ورم فشفاشنا ، وعمل لينا وجع قلب…كدا اظن خلاص… وزى ما قالوا (عدم الموضوع هو ذاتو موضوع