طيب عُموماً كِدا…
خلال الأيام الفاتت انتشرت شائعات مؤذية وكلام غير صحيح من بعض ضعاف النفوس، عشان كده وجب التوضيح
اتواصلت معاي عمتها هويدا عمر أحمد الخليفة (أخت والدها)، وأكدت الآتي:
انتشرت أقوال بتقول إنو تم اغتصابها من جهات معيّنة، وأقوال تانية بتقول إنها شردت مع ود عمها الخاطبها وسافروا بيها مصر
كل الكلام ده عارٍ من الصحة تماماً
عمتها أوضحت إنو:
عندها ولدين: واحد مقيم معها، والتاني في دبي
العمة التانية عندها بنات فقط وما عندها أولاد أصلاً
يعني كل الأحاديث عن ود عمها أو الهروب غير منطقية وغير صحيحة
وقالت بالحرف:
البقرة لما تقع السكاكين بتكتر، والناس البتتكلم ساي بدون دليل ما عندها حق الزول العندو كلام سمح يقولو، والما عندو يسكت
وأضافت:
مسك اليمن محجّبة وبتصلي كل صلواتها في اوقاتهم وقالت حتي في المدرسة كانت بتصلي في اوقاتها بتطلع من الفصل
وقالت ما عندها صحبات خارج إطار الاسرة وكانت محبوبة ومعرومة بطيبتها حسن تعاملها والصور المتداولة هي صور قديمة اتصورت داخل البيت في حال كانت فعلاً مخطوفة – لا قدّر الله – ممكن يكونوا أجبروها تشيل النقاب عشان كده تم نشر الصور لعلّ الناس تتعرّف عليها وتساعد
كما ذكرت إنهم يومياً بتصلهم بلاغات مختلفة
مرة قالوا شافوها في أم درمان
مرة في العزازي
ومرة في حدود مصر
وما بقوا عارفين يصدقوا منو ويكذبوا منو، لكنهم مضطرين يسمعوا لأي معلومة لأن أي تفصيل صغير ممكن يكون خيط نجاة
وأكدت:
الأسرة ليها 12 يوم بتلف في الولايات
وكل مرة يلقوا إنو المواصفات غير مطابقة
وهم موجوعين ومتألمين على بنتهم الغايبة
في الختام: الأسرة تناشد أي زول عنده معلومة حقيقية أو شاهد مسك اليمن يكون عنده دليل واضح ويتواصل فوراً،
وربنا يجبر بخاطركم جميعاً، ويجزيكم الخير على أي مساعدة صادقة
