نائب في مجلس الشيوخ المصري يثير الجدل .. “علاء عبدالنبي” يقترح إضافة 30 جنيه رسوم على إيصالات الكهرباء للقضاء على الكلاب الضالة
اشرف مصطفي الهندي
يعني هي دي أفكار وعبقريات أعضاء البرلمانات بتاعتنا
نواب خايبة ورخمة وهزيلة وعديمة الثقة في نفسها وكمان عديمة الذوق السليم
النواب الخايبة دي اللي عايشة في عالم موازي تؤكد كل يوم انها مش حاسة بالناس في مجتمعها
كما تؤكد إنهم ليس لهم أي لازمة ، لانهم لايعرفون الحد الأدنى من واجباتهك كنواب ، وأن أول مسؤولياتهم مطالبة الحكومة بأداء واجباتها على الوجه الأكمل وعدم التقصير في تقديم الخدمات المتنوعة لشعبها التي تحصل منه اكثر من 75 % من ميزانيتها
الاخ مش بيقترح فكرة عبقرية
ولكن بيزايد وينافق الحكومة باستسهال ولسان حاله : أنا أهو
شوفوني ، ومستعد أقول أي حاجة ترضيكم أو أي شيء تقولولي عليه
يعني 30 جنيه لمكافحة الكلاب الضالة ومثلها لقطط الشوارع
٣٠ جنيه للقضاء علي الزبالة
٣٠ جنيه للقضاء علي البلطجية
٣٠ جنيه للقضاء علي الفاسدين
٣٠ جنيه لشكوى شركة الكهرباء
30 جنيه للقضاء علي علاء عبد النبي وأمثاله
وبعدين نشوف بقي هنزود ايه علي فاتورة المياه وفاتورة الغاز وفاتورة التليفون الأرضي اللي ملوش لزمه وفاتورة النت
وشهادة الميلاد وشهادة الوفاة وضريبة العقارات والموبايلات وضريبة التصرفات وضريبة المبيعات والجمارك والرسوم كل دا محتاج يزيد
المهم تحيا مصر والشعب يموت
وهي مصر هتحيا ازاي بدون شعب كريم ، تقدره حكومته وتحترمه وتعمل له ألف حساب !
