من غرايب النفس وعجايبا ..
انا شخصيا عندي شكله راتبه ومعتمده في كل يوم من أيام رمضان .. لو رمضان تلاتين يوم
.. انا عندي تلاتين شكله .. لو تسعه وعشرين .. انا عندي تسعه
وعشرين شكله .. تقول شكلاتي جاياني في امساكية رمضان .. طبعا شكلاتي مش
النوع بتاع الضرب والخنق والتلطش داك .. لا ابدا هيجان ساكت .. وممكن شتاىم على الماشي مع إشارات غير لايقه
لا بتتناسب مع رمضان ولا غيرو من شهور السنه ..
المهم شكلة رمضان عندي اهم من الحلو مر بعد الاذان او … حسب مزاجك
قدر ما فكرت اظبط نفسي في الموضوع ده غلبني ..
الطريف حسب الرصد .. غالبا ما تكون الشكله عندي في الفتره الصباحيه .. من تمانيه لي عشره
كده .. وغالبا ما اكون وانا سايق ماشي في الطريق .. وكان جلت
من الطريق .. ما بتجلي من مكان الشغل .. َودي عادة بعد اطناشر .. كمان كان دي جلت ببقى الاعتماد كلو على الشكله
وانا راجع البيت .. أما إذا دي ذاتا جلت بكون ما في حل غير شكلة البيت ودي وكتها بستمر لي ما قبل الاذان ..
صحي من سنوات القصه دي بدت تقل بي عامل السن وكده
.. جات الحرب حولتني لي متفرج من الدرجه الممتازه خاصة ونحن كلنا بعيدين عن ديارنا .. بس وحياتكم اشتقنا لي كل شي .. كل شي بلا تحديد ..
انا اشتقت لي كل شي .. اشتقت لي رمضان هناك بي كل تفاصيلو ََ.. اشتقت حتى لي شكلاتي اليوميه .. معقول شهر كامل وانا بدون شكله حنينه واحده كده بلا سبب .. ومع زول لا بعرفو ولا بيعرفني ولا حوه وادم بتلمني بيهو ..
المهم نتلاقى ونختلف بلا سبب ونشاتم وكل واحد فينا يمشي في اتجاه .. بس نحن كلنا في اتجاه البلد البنريدو ..
معليش … بكره بتقيف الحرب غصبن عن ابوها .. وبكره نرجع بلدنا … وتاني نرجع نتشاكل في في محبه .. شكله بلا حقد او كراهيه .. مجرد شكله والسلام ..
صدقو او لا تصدقو .. في واحده
من أكبر شكلاتي الرمضانيه علي الإطلاق .. لقيت ليك نفسي .. بعد كم يوم كده مع نفس الزول
الاتشاكلتا معاه في برش فطور واحد .. اها اقول ليكم المبالغه
في بطن بيتو .. وطلعنا اهل كمان ..
شفتو كرامات رمضان دي كيف
.. وشفتو نحن شعب طيب كيف
.. في الختام ..
انا اشتهيت لي شكله واحده .. بيها اطمن عليك ..
وتنقذ الموقف شويه …
