من إعتصام الموز وإنقلاب 25 أكتوبر 2021 علاقة البرهان والمرتزقة قيادات الحركات المسلحة مبنية على المصالح الآنية

هشام علي ود قلبا
من إعتصام الموز وإنقلاب 25 أكتوبر 2021 علاقة البرهان والمرتزقة قيادات الحركات المسلحة مبنية على المصالح الآنية ، كل مصلحة بوقتها وأي شيء بمقابل وتمن ورزق اليوم باليوم “توتو على كبوتو” .. عشان كده طابع العلاقة الاساسي هو الشد والجذب والغزل والردحي والمدح والمطاعنات ، حسب الحدث وحوجتهم للبرهان وحوجة البرهان ليهم وقت الحدث .. علاقة مصلحة مثالية ، مهووس سلطة وحكم لاقى مرتزقة محترفين ..
الحقيقة دي واضحة ما عاوزه ليها عدسه مكبرة عشان تتشاف ..
إحتاجهم البرهان حاضنة لأنقلابه وشريكه حميدتي ولقاهم جاهزين في أعتصام الموز .. تم الانقلاب على الثورة الجابت البرهان من بدروم الأرشيف وجابتهم من ذل الارتزاق في ليبيا وتشاد .. وزع عليهم كراسي المناصب مصو ومازالوا بمصو دم الشعب منها ، وشريكه الجنجويدي وزع عليهم الكاش ..
جات الحرب بقوا بين مصلحتين عين على الكراسي وعين على الكاش ، وهم مرتزقة محترفين عصروا البرهان بحيادهم سبعة شهور لحدي ما خلوه مع الكراسي يديهم الكاش ويغض الطرف عن فسادهم ومصهم دم الشعب .. ما فكوا الحياد ودخلوا الحرب إلا بمقابل سلطة ووزارات وتستر على فسادهم + كاش عديييل ، ولحدي الان قياداتهم بقبضوا شهريا كوتة الدولارات ..
وطوال فترة الحرب الشد والجذب والابتزاز شغال ، مثلاً :
في معارك الفاو رفضوا يشاركوا لانه كان عندهم طلبات زيادة كراسي وباقي كاش عند البرهان وطنشهم ..
ومثال تاني .. لما جاء التشكيل الوزاري والبرهان حاول يعيد تشكيل الكراسي البفتكروها حقتهم بشهادة بحث ، عشان يعصروه انسحبوا من المثلث ….
وهكذا الأمثلة كتيرة سلماً وحرباً ..
أي توترات بينهم تطلع للسطح ، هي مجرد كروت ضغط منهم على البرهان أو العكس .. وحسب الموقف والحدث البرهان مرة يعصرهم ومرة يعصروه .. ديل مرتزقة بعرفوا متين يسردبوا ومتين يرفعوا قرنهم ويبتزوا .. والبرهان ود موية بدرجة خسيس بعرف متين يرخي ليهم ومتين يعصرهم .. الشغلة عند الاتنين مصالح وجود فقط لا غير .. رغم أنهم ألد حلفاء لكن أطماعهم ومصائر وجودهم (حاليا) مرتبطة ببعض .. عشان كده مهما بلغ الاحتقان والشد بينهم ، الاتنين حريصين ما يوصلوا مرحلة الصدام.
لذا .. لما تشوف عجاجة الشد والجذب بين البرهان ومرتزقة الحركات المسلحة ما تركز معاهم ، فتش حولينهم حتلقى غنيمة في متناول يد واحد والتاني ببتز فيه عاوز نصيبه من الغنيمة أو يتنازل ليه عن غنيمة أخرى.
#مافي_مليشيا_بتحكم_دولة