حتكتشف! إننا نحنا ما الشعب المميز ، ولا الأكتر تدينا، و نحنا ما الشعب الصادق شديد ومكمل الفهم…
محمد الشريف
حتكتشف! إنو جامعاتك مجرد حيشان كبيرة زيها زي أي إسطبل بتاع
حصين مافي زول معترف بيها ولا داخله في أي تقييم إقليمي او عالمي للصروح التعليمية ،
حتكتشف إنو شهاداتك العلمية مجرد ورق
حتكتشف! إنو كتير من شعوب العالم ما مهتمين بيك أصلاً ولا بعرفوا السودان دا بقع وين في الخريطة ،
حتكتشف! إنو قبيلتك و النفخة الكضابة بتاع نحنا عيال فلان و نحنا ناس فرتكان مجرد خزعبلات
ما بتسقيك مويه من خور …
حتكتشف! إنو الموية و الكهرباء و شارع الظلط و الإنترنت 5 جي
الناس فاتتهم زمان و هنا ما بمش بعيد بتكلم عن دول جارة لينا
حتكتشف! إننا عايشين في السودان كالأنعام بل أضل ،
حتكتشف! إنو
حنك النقاء العرقي و ( حروريه ) الدم أكبر كذبه ربوك عليها ، لا بتوفر
ليك شغل لا بتزيد مرتبك لا بترفع قدرك بين الأمم …
حتكتشف! إنو إنت مجرد كائن ساي نافخ نفسك بأوهام و أمراض في
الفاضي تجاوز عنها الزمن ،
حتكتشف! إنو كتير من الشعوب عندها إهتمامات تانية غير ( الجنس ) و الطقه و النوم …
حتكتشف! إنو إمتلاك صنعه او حرفه ( مكنيكي، كهربجي، بناي ) علي سبيل المثال أفضل مليون مرة من الشهادات الجامعية في كتير من الأحيان و إنو البمارسهم ما شماسي و صعلوق و فاشل زي ما صوروا
لينا و نحنا صغار …
حتكتشف! إنو ( العربية ) مجرد وسيلة مواصلات و ما أداة تقييم مجتمعي،
حتكتشف! إنو التلفون مجرد وسيله إتصال و ما شئ
للفشخرة يقيموك الناس بيهوا …
حتكتشف! إنو القهوة مجرد مشروب ساخن وما عندو علاقة بالذكاء
و العبقرية يا ( عبقري ) إنت ،
حتكتشف! إنو البيتزا و الهوت دوق
مجرد أكلات شعبيه زيها زي العصيدة و الكسرة …
بل دا أكل شوارع لشعوب أخري و لامن تاكلها ما حتبقي واااو
زي ما قاعدين يعملوا بعض الناس في السودان
حتكتشف! إنو السوداني الفي البلد بعزل في الشغل و بقول ليك الشغل
دا ما شبهي و داك ما ( برستيجي ) في الخارج مستعد يشتغل , زبال، جرسون حداد، عتالي ، مرسال ،راعي … الخ
حتكتشف! إنو البنت الجميلة في الحي و أهلها ناس ( واااو ) بفتشو لعريس دكتور لبتهم لو مشيت إتقدمت ليها و إنت خارج السودان بقبلوا بيك حتي لو كنت ( زبال ) ..من إنفصام في الشخصية و حقيقين
نحب تمجيد الذات و النفخة الكضابة ، نحب الفشخرة و الجري !!
