اتصل بي عدد من أصحابي ..
ناس بشري وعاطف ..
بكره يا هلاوي يوم عشره مايو .. الذكرى السابعه لرحيل صاحبك عزمي ..
قربتا اقول ليهم من يوم رحل
عزمي ولي هسه .. كل الايام من
بعدو رحيل .. كل الايام صيوان عزا .. وكسر تربه .. ودمعه في منديل ..
الله يرحمك يا عزمي .. انت عارف انك في حياتي، حاجات
كتيره .. لو ما كل الحاجات .. مما عرفتك وانت عندي جو الطيف .. موية زير بارده وضل
نيمه وضحكه بترجع القلب لي سنه اولى ..
عزمي والسنه جنبك سته شهور .. ناقص سته.. َالخريف
شهرين وكذا الشتا والصيف .. وعزمي جمبك ايام الاسبوع تلاته وساعات اليوم سته بهرب وين العمر انا ما عارف .. انت
القدره على تحويل كل الامكنه
لي مكان واحد مستف ضحك
وحسن نيه .. مدرسه ذات طابع خاص في محبة خلق الله ..
ما يسألوني عن اصحابك .. ده ما جايز .. الصاح يسألوني منو الما صاحبك .. تخصص في مخبة الناس بدون قيد او شرط وانت حالة خاصه .. انسان بشتري وببيع الحب مهما ارتفع
ثمنه .. بي الجمله .. قطاعي مافي .. وعزمي متى وجد الحب بشتري كل الشحنه .. ينزل
اللوري كلو .. أصحابو بي
الجمله .. حبيباتو بي الجمله
.. والعجيب صادق معاهم كلهم .. بكتب ليهم كلهم زسايل
وقصايد ويواعدهم وببكي من قلبو لو جو .. او ما جو .. تردي وللا ما تردي .. بكتب ليك يوماتي ..
عزمي قدره خرافيه على جمع الناس على اختلاف مشاربهم
في حلقة حب واحده .. وقدره
على التحرك في كل الاتجاهات
الحنينه .. تشرك لي بي بسمه ..
وبيت شعر .. كل الشعرا في الدنيا حبايبو .. وليهو مع كل مغني او عازف حكايه .. من الامكنه المفضله عندو باب بيتنا في الميرغنيه وهو يتابع حركة المواصلات .. وتمر يا بص
الثانويه .. شايل ست روحي وعينيا ..
بي المناسبه عزمي في بيتنا ما كان صاحبي براي .. ده صاحب
امي واخواني واخواتي .. زوجتي
وعيالي .. نسابتي وجيراني .. انسان زي ما قلت ليكم بحب
بي الجمله .. او انسان بحب الحب في روحو .. او قول حالة
حب جات الدنيا..
سبقني عزمي على نشر قصايده
في الصحف والمجلات وان سبقته انا على مطربي العاصمه
.. خبر زفاف لعثمان مصطفي كانت أولى اغنياته الحان موسي
محمد ابراهيم .. وبعد داك ما تشوف الا نور .. ده كلام برا ..
من قلبي بنمني لو كتبت كتاب
عن شعرو كل حياتو من الابره والدبوس لي الطياره حاضره ..
هو في المملكه .. لي الامارات
وحتى أمريكا التي عاد منها
على كفن .. عشان نستقبلو في
مطار الخرطوم انا واصحابي محمد نجيب محمد .. علي وعزالدين هلالي في متل نفس
اليوم ده قبل سبع سنوات ..
واه من الدنيا ..
عفوا عيوني بس غصبن عنك
حأكتب واكتب عن عزمي وكل
الناس الطيبه الجات بس شان
تجمل الدنيا ..
عزمي ..
يعني كيفن ما بريدك ؟؟؟؟
هلاوي
