ولما السودانيين قالوا ليهم (لا) حرقوا السودان بيدهم ويد جناهم السفاح الجنجويد .. مسوخ والمسوخ ما بلدوا غير الأمسخ منهم ..

هشام علي ود قلبا

ما لاقي تفسير منطقي من زعل بعض الناس من جملة (ما عدا المؤتمر الوثني) أو ما في حكمها ؟؟
زعلانين ليه !!
هو الموضوع موش حوار وأراء ومدنية وكده ؟؟
طيب تعالوا نمسكها واحدة واحدة ..
– علاقة (المؤتمر الوثني) بالحوار والرأي والرأي الآخر شنو ؟؟
ديل كائنات دقوا مسمار في راس طبيب (الشهيد. علي فضل) عشان قال رأيه ، بس ما عمل أي شيء أكتر من كده ، قابلوا رأيه بمسمار في راسه.
ديل كائنات سحلوا طالب (الشهيد. محمد عبد السلام بابكر) على رأسه بالسلم ثلاثة طوابق عشان قال رأيه في مرتبة ومروحة ولمبة مخصصات داخلية طلاب ، والقاتل أدوه مكافأة وعينوه معتمد محلية ..
رأي شنو الفي سوداني عاوز يسمعه منهم بعد ما كل السودانيين لفظوهم بثورة ورموهم في مكانهم الطبيعي في أوسخ صفحة من التاريخ ؟؟
– (المؤتمر الوثني) علاقته بالمدنية شنو ؟؟
ديل كائنات خسيسة ما عندهم ذرة أيمان بالديمقراطية ولا بالمدنية ، أجهضوا المدنية والديمقراطية وإتسلطوا على السودانيين متلبدين وراء دبابة في 1989 ، لأنهم لا عندهم فكر لا مشروع لا شعبية لا حجة ومنطق ينافسوا في أي ممارسة مدنية ديمقراطية .. فكرهم ومشروعهم حب التسلط وشهوات فروجهم ومال السحت يملوا بيه كروشهم ، غير كده ما عندهم أي شيء.
– طيب هم عاوزين يشاركوا على أساس إنهم شنو ؟ حزب ؟؟
أبداً ما حزب .. دي جماعة إرهابية العالم كله بشكي منها ومصنفها خطر على البشرية ، وبأمر الشعب السوداني تم حلها ، حيشاركوا بوصفهم شنو ؟؟
– الحوار ده موش بخص السودانيين ؟؟
السوداني في (المؤتمر الوثني) منو ؟؟
السودانوية ما رقم وطني وشهادة ميلاد وعمة وسروادوب ومركوب وسديري وجلابية وعراقي ، وأب قجيجة وحُق وقرمصيص وسباتة وقدح ..
البستحل دم السودانيين عشان شهواته قطعاً ما سوداني ..
والبحلل إغتصاب السودانيات حسب سحناتهن ما سوداني ..
والبنهب عرق جبين وثروات السودانيين ما سوداني ..
والبسرق عشرات السنين من أعمار السودانيين ويعيشهم في قهر وظلم وتسلط وتجبر ما سوداني ..
الحوار ده بخص وطن وأمة ، ودي مفاهيم ما موجودة في نفوسهم المريضة .. حتحاور كائنات في شؤون الوطن والأمة وهم ما بعرف يعني شنو وطن ، وما عندهم للأمة غير التسلط ومص دمها سحت وسفك دمها إذا في زول قاليهم لا ؟؟
ولما السودانيين قالوا ليهم (لا) حرقوا السودان بيدهم ويد جناهم السفاح الجنجويد .. مسوخ والمسوخ ما بلدوا غير الأمسخ منهم ..
لاااا يا مسوخ أي شيء في السودان ببدأ وبنتهي ب (ما عدا المؤتمر الوثني) ، وخليكم من تحكمونا ونحن أحياء دنيا ، تاني قبورنا ما بتحكموها.
#كيزان_مسوخ