الجمال الفي عيونك
حاجه من صنع الأله
والنضار الفي وجيهك
فيه من لون الصباح
والعبير عطر نداك
عطره في أرجانا فاح
طلتك في دنيانا راحه
ويوم لقاك لينا الرواح
بيك بتجدد فرحنا
والقلب زايد أنشراح
زفة النور في عينيك
ضحكة أطفال مع الصياح
رمشه من عينيك غزل
دعوه للحب المباح
والخدود لون الخجل
كاشفه سرك بافتضاح
والشفاه …والله الكرز
شهد في قرص ..و ساح
حتى عقدك كاسي جيدك
كالنجوم- في مجرة لاح
والقمر نام في وجيهك
والشعر صار زي وشاح
الصدير – شرفة منارك
جوز حمايم… ليه أستباح
كتفك الماهل – وساده
أرمي ساعديك بارتياح.
ناعمه أيديك والله زاهيه
القطيف… فيها أستراح
ردفك الواحل مشيه
صاد قلوبنا وليها طاح
بين صديرك وعالي ردفك
أندثر خصرك … وراح
القوام يالبانه -عودك
راقص الأنسام .. وماح
ساق نعام – والله عندك
ليس ناحل…الا صبوه صاح
يالمشيك وزينه تقدل
خطوه خطوه ..وبارتياح
كم عشوق بهواك مغرم
وكم حبيب مثقل جراح
وكم أسير في القيد مكبل
كل رجاه …منك سراح
أنت أظلم ..وليك تظلم
راجي عطفك..والسماح.
كان نظرت وراك لحظه
جيش أحبه…في قفاك لاح.
حسن خالد حسين.
