لحظات رومانسية هادية على رصيف محطة مترو في مانهاتن انتهت بكارثة حقيقية. الشاب نافام كاول وصديقته ماليكا شيتري، الاتنين عمرهم 24 سنة، فقدوا حياتهم تحت عجلات القطر رقم 4 بعد ما فقدوا توازنهم ووقعوا على القضبان في ساعات الفجر الأولى من يوم الحد اللي فات.
الحادثة اللي حصلت تحديدا قبل الساعة 3:15 الفجر في محطة سبرينج ستريت، بدأت وهم واقفين على الرصيف بيحضنوا بعض. فجأة، نافام فقد توازنه ووقع، وحسب مصادر الشرطة، راسه اتخبطت بقوة وقت السقوط.
ماليكا حاولت تنقذه وتشده ناحيتها، لكن القطر كان أسرع منهم. سائقة القطر قالت للمشرفين إنها لمحت شاب وفتاة على القضبان وإن الفتاة كانت بتحاول تشد الشاب، وضربت فرامل الطوارئ فورا، لكن 4 عربيات من أصل 10 كانوا عدوا فوقهم بالفعل قبل ما القطر يقف تماما.
الشاب والفتاة من ولاية نيوجيرسي، وجمعهم قبل كده الدراسة في جامعة روتجرز. ماليكا كانت بتشتغل أخصائية عمليات جودة في شركة أدوية، ولسه بادئة في شهر أغسطس اللي فات برنامج دكتوراه في الصيدلة بجامعة تمبل. أما نافام، فكان بيشتغل محلل مالي كمتعاقد مع وكالة بلومبرج لمدة سنة انتهت في مايو اللي فات.
الشرطة استبعدت تماما اي سيناريو تاني غير إنه حادث عرضي ، وبتركز تحقيقاتها حاليا عشان تعرف إذا كان الكحول ليه دور في فقدانهم التوازن قبل السقوط ولا لأ. وقت الحادثة، كان في حوالي 100 راكب جوه المترو، وتم إخلائهم بالكامل للرصيف بعد توقف الحركة.
فرق الإنقاذ انتشلت جثث نافام وماليكا من تحت العربية التالتة والرابعة في موقع الحادث، في الوقت اللي لسه المحققين بيحاولوا يحددوا اللحظة اللي قدرت فيها سائقة المترو تشوفهم بوضوح، خصوصا إن القضبان في المنطقة دي بتاخد منحنى بسيط قبل دخول المحطة.
