الغضروف منك.خوف : بقلم الاستاذة منال محمد الحسن المحامية

عندما اصيبت بمرض( القضاريف )وقصدت الجمع لاني والحمد لله مصابة.بغضروف الظهر والرقية والرجلين والراس والحمد لله قبل سنين عددا
وعن تجربه اقول ليكم المرض دا اسبابه الرئيسية طريقة تعاملنا الخطأ في الجلوس والوقوف والانحناء وو
منذ .صغري ومرورا بالشباب وحتي شيبي اشيل واعتل وفي فترة.الغربة تستيف الشنط ورفعها أعالي الدواليب وانزالها بكل سرعة ورشاقة كان له اكبر الاثر في ذيادة المشكلة
بتذكر اول مرة.اقابل الدكتور قبل سنين عديدة استغرب قال لي انتي.شغلك شنو؟لانو ناس الزراعة والحمالين ونحن بنطلق عليهم عتالة ديل أكثر ناس معرضين حسب معلوماتي
ما يجي طبيب ينط لي كمان في حلقي ويقول لي دا ما اختصاصك
المهم باختصار حتي شغلي في المحاماة كان مشكلة لانو الجلوس في المكتب كتير والوقوف في المحكمة خاصة في بلدنا ممكن ما تلقي كرسي تقعد وتحضر قدامك عشرة.جلسات حتي دورك يجي
تعليمات الدكتور وقتها كانت واضحة ما اشيل حتي جك موية مليان مااجلس كتير ما انحني لغير الله (وحتي الصلاة بقت بكرسي) واكيد انقاص الوزن مهم شديد
وانا ما التزمت وختمتها بجلسات علاج طبيعي في مصر وعدت متحمسه للمحافظة ولكن لا حياة لمن تنادي
كل القص والرص دا عشان اقول ليكم المشكلة الحقيقية ا التي اعاني منها الان ماذا افعل؟
توصية.غضروف الرقبة ما انام اوقات طويلة
توصية غضروف الظهر ما اجلس كتير
توصية غضروف الرجلين ما اوقف كتير
توصية جميع الغضاريف ما امشي مسافات طويلة
كل غضروف توصيته تختلف من الاخر
اهااا يعني اطير ولا أقع البير؟؟
دعواتكم لي ونصيحة.مني لمن طبيبك.ينصحك ما تهمل نصيحتو
وعساكم ما تتالموا زي المي دا
وربي يدينا الصحة والعافية جميعا
كسرة:الصورة دي توريك انو اخرها بكون دا اكسسوارك المفضل والحمد لله رب العالمين وياريت تقيف علي كدا