من زمن كنا صبيان .. بنقرا مجلة الصبيان .. ده زمن كان
الحكومات بتعرف في الدنيا ان في أطفال .. شان كده ما غريبه ناس التربيه والتعليم يصدرو مجله .. وما غريبه تكون في شخصية زي شخصية الفنان شرحبيل احمد شان يبتدع لينا بي فكرو وريشتو شخصيه زي شخصية عمنا تنقو .. وشوف الطرفه والمفارقه البتعلم ..
كبرنا وسامعنا موسيقى الجاز وعرفنا شرحبيل احمد وعرفنا
نوع مختلف من الغنا .. وأنا من
يومي بحب في الفن الاختلاف ..
وجنى جن وضع الحافر في الحافر .. كل اغنيات الفنان العظيم شرحبيل كانت بتعجبني
.. كلماتو والحان وطريقه اداهو
البتفتح شارع رئيسي بين الروح
والقلب .. تعجبني وقفتو .. وقفة فرقتو .. وتعجبني وقفة زوجتو العظيمه زكيه في الفرقه وفي
الحياة .. وأهي دي الوقفه الما
فيها تاني …
عرفت من خلال اغنيات الفنان
شرحبيل احمد أعظم الشعراء ..
بشير محسن .. وسعد قسم الله واحترمت اكتر صديقي سوركتي
ويا سوركتي لسه بتقول مشتاق
.. مسكين الشوق ..
الفنان شرحبيل احمد عظمه في عظمه في كل شي .. عظمه في فكرو .. في كلامو .. في
سلامو وفي ابتسامو .. فعلا فعلا فنان برتبة ملك او ملك
برتبة فنان .. تشرفت بي العمل في بلاطو لأكثر من ثلاث مرات وادهشني زي ما بقول ود امي
شكرالله خلف الله اهتمامو
والتزامو .. مع قدره عاليه
على الاحتفاظ بجمال صوتو البتحدي فرقة عقد الجلاد بي
كل ما فيها من شريف .. مع مساحة حب لا تنتهي لي كل خلق الله
الملك شرحبيل احمد حكاية حب يتبادلها الملوك والرعيه .. الله يخلي لينا الملك …..
