ودار بينهما الحوار التالي:
– جنوب الحزام:يا سعادة،زوجتي بتموت..الوحم طلع ليها في رأسها..والليل كله بتهضرب(جيبوا لي ندى..روحي قربت تطلع..عاوزه ندى)..!.
-سنكات:يا سعادتك نحن شغالين في الموضوع..
أسي نحن مجتمعين مع صاحبتها (رترته)..
وبنفيدك بعد شويه.
– جنوب الحزام:ضروري يا سعادتك تنجز لي الموضوع دا..بأي ثمن..
ولو الدولارات ال رسلتها ليكم ما كفايه،،ممكن أرسل ليكم سبيكة جاتني قبل يومين..دهب من جبل عامر..!.
-سنكات:عُلِم وينفذ ..
سيادتك ما تشيل هم..
……………………………
(رترته)وهي في الحمام،راسلت ندى:
*رترته:كيفك ندو..
#ندى:أهلاً رتوته..طولت منك..
*رترته:والله أنا في إجتماع بخصوصك..قائد الدعم السريع في منطقة جنوب الحزام زوجتو عيانه شديد..ومحتاجة ليك.
#ندى:بريييييييي يا يمه..
سجمي يا رترته..إنتي عاوزاهم يضبحوني..!.
*رترته:الموضوع إنساني،ما ليهو علاقة بالحرب..!.
وبعدين الناس ديل جوا شايلين دولارات،غلبني أعدها..!.
شيء لا بتحكي،ولا بتوصف..!.
#ندى أخدت ليها وقفة،ثم قالت:طيب يا رتوت..خليني أفكر..
وبرجع ليك بالليل.
…………………………….
(رترته)طلعت من الحمام..
القائد وأركان حربه كانوا في إنتظارها..
اعتذرت ليهم بحجة إنها عيانة شويه..!
دخلت مع القائد في حوار مباشر:
-رترته:حا تدفعوا كم؟!.
– القائد: 5 ألف دولار.
-اِبتسمت رترته ابتسامة خبيثة،ثم قالت:زول حا يمشي من هنا ل(الخرتوم)..وفي الظروف دي..دا كُله ب5 ألف دولار..؟!.
اعفوني من (الفيلم) دا.
– القائد:وإنتي حقك بره..!.
-رترته:أنا هينه..
……………………………
ثُم عرضت عليهم صورة ندى وهي في حفلة،تسبح في بحيرة دولارات،
بنيجيريا..!.
……………………………
القائد زاد المبلغ قائلاً:
خلاص حا نعملها 10 ألف دولار..!.
…………………………….
(رترته)فاهت بكلمة واحدة:ندى ما بتقبل بأقل من 30 ألف دولار..
ودا داير مجهود مني..!..
بس حقي أنا حا يكون كم يا سعادتك؟!.
…………………………..
إنتي حقك بره..5 ألف دولار..
يقول القائد..!.
……………………………
(رترته)تظاهرت بالزعل..
نفضت قميصها،،ووقفت وهي تقول:أعفوني من الموضوع دا..!.
……………………………..
القائد قال لها:صلي على النبي..أقعدي..!.
………………………………
فجلست..!.
………………………………
تعليق:
(!)مؤتمر وطني حكم ل 30 عاماً..
(!)القونات “ورترته”، (والشريف مبسوط مني)
،،ظهروا في عهدهم..!.
(!!)الدعم السريع هم الذين أسّسوه وقننوه وسموه (حمايتي)!.
…………………………..
قال تعالى:(وَكَذَٰلِكَ نُوَلِّي بَعۡضَ ٱلظَّـٰلِمِينَ بَعۡضَۢا بِمَا كَانُواْ يَكۡسِبُونَ)..!.
……………………………..
**عادل سيدأحمد*..
*رئيس تحرير وكاتب سوداني*.
