رسل لي الصديق الغالي عاطف
عوض فيديو صغير لي جزء صغير من حفل صغير .. انا لي
هسه ما عارفو وين .. حفل ربما كان في منطقه منسيه لي ناس منسيين في خارطة الدنيا.. لكنو كان أجمل حفل في نظري وانا بشوف الناس مبتهجه وسعيده
بتغني .. انت رجع لي رسايلي
.. والرسايل العندي شيلا..
عليكم الله كلماتي لو سألوها دايره اكتر من كده شنو .. او بتتمني اكتر من كده شنو انا
متأكد حتقول ما دايره وكفاي كده .. اقرط على كده وبس وكفاها قدرت تمشي لي أماكن هي ذاتا لو سألوها ما عارفاها وين .. تدخل بيوت ما كان بتحلم تدخلا .. وتقعد مع ناس أصدق من معني
الصدق وابسط من كل البساطه
.. وتغني معاهم ودمعتهم فوق
رموش عيونهم .. يعيشيو الحياة بين الروح والطلقه .. ثقتهم في روحهم ما اهتزت ولا ايمانهم
بي ربهم نقص .. وبعد ده كلو
يغنو في غناك بي احساس ما
موجود حتى في أكبر المدن واعظم البنايات ..
ديل اهلي .. وديل راس مالي .. وديل رصيدي البلقي بيهو ربي
.. ودي الاغنيه الما بتعرف ليها
خرطه ولا في ايدها جواز سفر.. وكفاها شرف انها بتشبه الناس دي وهم بشبهوها .. وصحي الاغنيه الصادقه مائدة الصادقين َ.. يتقاسموها زي النبقه .. يشدو بيها حيلهم . َ
وتمسح بيها السمحات دمعتا بدون ما تفك طرف توبا .. وتاني
وتالت وميه والف يا سلام عليكم
اهلي الطيبين .. الغنا بتاعنا لو
ما كفاكم انتو .. يحرم علي التانين ..
هلاوي
