هشام علي ودقلبا
المنتظر إقالة الإعيسر أو كامل أدريس ، ما يرفع سقف توقعاته شديد .. ما عشان سواد عيونهم أو كفاءتهم ، ببساطه لأنه حالياً مافي بديل في يد البرهان ممكن يعمل نفس البعملوه ليه الأعيسر وكامل ادريس ..
للصراحة البرهان إتوفق فيهم شديييد ، مافي أحسن منهم لخدمة مشروعه الشخصي وتحقيق حلم أبوه البقى حلمه .. أما مقايبس نافعين ولا ما نافعين ، فدي ما زي ما أنت عارف من مقابيس وأستاندر نجاح وفشل ونفع وعدم نفع أي رئيس وزراء ووزير إعلام :
كفاءتهم : لشنو .. يعمل بيها شنو البرهان ؟!
اداءهم : ما مهم هو في زول براجعهم غيره ؟!
كذبهم وتدليسهم : هم موظفين عند الأكعب من مسيلمة وبن سلول ، مفروض يكونوا شنو يعني !!
سفرهم الفارغ : أهو يتسلوا هو دافع من جيبه؟!
عوقات ومليانين أمراض نفسية : ده الطبيعي ، هو في زول نصيح بقبل يشتغل شغلانياتهم دي؟!!
مرضانين مناصب : دي ميزة ما عيب ، وأهم ميزة كمان ، دي البتخليهم مطيعين ومسلمين ريموتاتهم طوعاً وأختيارا ..
البرهان لو أدوه مصباح علاء الدين السحري ما حيتمنى غير الأعيسر وكامل إدريس .. ياخ أقل شيء ليهم تلاتة ايام بتنططوا في مسرح عرائس الفوضى والهزل ، يوم شغلونا بمؤتمر صحفي إتكلموا فيه كتير وما قالوا أي شيء ، ويومين الإعيسر ينفصم في شاشات الناس منفوخ يصرح ويهدد ، ويصبح ينكر كلامه حطب .. والبرهان مافي زول مركز معاه ولا معروف بسوط في شنو.
