اسمو سهل الطيب .. ويا سبحان من جعل لي كل إنسان نصيب من اسمو .. سهل الطيب .. انسان ابسط من طرقة كسره بي مويه والدنيا صيف.. وكت ما تزورو في دكانتو تلقى يفرح بيك زي ما بفرح المحب بي شوفة محبوبو .. اول حاجه يقعدك في حته مريحه رغم انو الدكانه صغيره لا تسع اللوحات البرسما .. فجأه وبلا مقدمات تلقى قطع الشارع وجا شايل ليك الفول والبارد ولما تشوفو تتذكر قصيدة الاوليه بتاعت .. جاء اسماعيل تبدو بسمة في شفتيه ..
حامل صحن طعام ورغيف في يديه ….. وتحس بي انك فعلا هر قدام حنان سهل .. مع انو يكون في جيبو ما عندو ابو النوم .. دكانة سهل تقع في شارع التيجاني الماحي .. شان كده ما غريبه تكون ملاذ لكل المبدعين المجانين بشتى صنوفهم .. وأهي قطعت ظلط ..
سهل الطيب .. أو الطيب سهل ما يفرق في شعراء دكانة سهل منزلتهم الأولى وتلقى الواحد بقعد فيها اكتر مما يقعد في بيتو .. ولو الواحد غاب من بيتو عارفهو زوجتو بتلقي وين .. وفي واحدين كان ما جو تممو في دكانة سهل ما بمشو حتى لي اشغالهم .. واحدين ماشين مكان بجو اول عند سهل .. في الرجعه برضو سهل لزوم التمام ..
الناس لما يكون دايرين يتواعدو
يمشو مناسبه .. دكانة سهل هي الملتقى أو المؤسسه .. بي اختصار دكانة سهل نقطة ارتكاز الكون في كون كل الأصحاب والأصدقاء المبدعين ..
مرات بتلقي سهل منهمك في لافته أو لوحه لكن بالو كلو مع أصحابو .. تلقى شغال ويضحك..
ومرات تلقى فاضي بس، تأكد انك ما حتغادر الدكانه والا وانت
محمل بي لوحه تحمل اسم اغنيه من أغنياتك شان تعلقا في حيطة قلبك .. قبل حيطة بيتكم ..
سهل الطيب ما عندو حاجه صعبه في الدنيا مع استعداد
فطري لازالة القبح وصناعة الجمال .. يا أخ دي عمل من كوشه حديقه حيعمل في الحديقه شنو ..
سهل الضحكه والابتسامه والصبر على مرارة الحياة .. من تعرف عليه تعرف على خلق كثير وادك معنى جديد من معاني الحياة ..
عفوا سهل كان بودي ان اكون أجمل وانا اكتب عنك للمرة الثانيه لو لا ان عيوني تعاندني
وتشير لي توقف …
هلاوي
