دمعات علي خد النيل..

حزين ..يانيل…علي حالك..
عيالك…. يضبحوا… عيالك..
حرام ….تتلون …اوصالك..
يجيك الدم …خليط باليم ..
وأنت ….تفيض…..وتتالم ..
دمعاتك تسيل كئيب يا نيل..
وطنك حالو ….من حالك..
ومع ضياع مزارعك وتربالك ..
تمن …ارواحنا ..اصبح كم..
وسواد الليل… علينا حكم..
خلانا شتات ..متين نتلم..
زولنا الياما.. صال ونضم..
ولو مخزون.. غلالو …عدم..
يعزم الضيف ..طلاق حرم..
مالو الليلة ..حسو ..كتم ..
لبد مكسور غريب في الهم ..
خلف الذلة.. وإغاثات الامم ..
وهل يصح من تاني نتكلم ..
ويا خجلة …بنات ….العم..
عن شهامتنا وسماحة اللصم..
ما دام صوت السلاح تمتم..
وعقل الصرامة اضحى عشم..
ونحن… المن صغار…. نعلم..
كبارنا ..زمان ..بعقدو الدم ..
بعصاية الحكمة في الماتم..
قبال ما…. .الفتنة …تتقدم ..
وسيوف… القبيلة …تتقسم..
كانو شموخ ..يضاهي قمم..
ومفاخر …عزة …. أجيالك..
ووين …نلقاها …امثالك..
مهما تهنا وعشنا في البلدان..
نكوس العيشة ذل وهوان..
ونحن…. الكنا …ياسودان..
صقور من عينة الجديان..
نرك فوق… هامة الفرسان ..
وياما بنينا كم …اوطان..
نجود بضراعنا… للإخوان..
نفيرنا نشيط علي البنيان..
نعين…بالخفية ..والكتمان..
ونستر …حاجة العدمان..
ولا ….بتفشروا …رجالك..
مناقزا …الحلاوين…جزيرة السودان… 28/1/2025