في جوازات المناقل بتحصل حاجة غريبة وهي انك لما تمشي المالية عشان تسدد ال170 الف جنيه رسوم استخراج او تجديد جواز سفرك بقولو ليك مابنقبل بنكك …
كيف يعني مؤسسة حكومية مابتقبل بنكك …؟
وهل في توجيه بذلك من ادارة الجوازات لناس المناقل انهم م يبقبلوا بنكك ولا قطعو الموضوع دا من راسهم…؟
ولو فعلا في توجيه من فوق فياريت تورونا السبب شنو لانو في ازمة كاش وانتو اكيد عارفنها يعني …؟
ولو الحكاية دي ابتدعوها براهم ليه م حاسبتوهم عليها ….؟
المهم لمن تقول ليهو م عندي كاش ف طوالي في زول بوجهك لي كشك داخل حوش الجوازات يبعد 30 متر فقط عن شباك المالية ويقول ليك في الكشك داك بتلقى زول يديك كاش مقابل بنكك .. اها تمشي للزول بتاع الكشك تلقاهو مجهز حزم القروش ربط ربط و اي ربطة فيها 185 الف جنيه جاهزة وطبعا بتحول ليهو 200 الف عشان يك ربطة بخصم اكتر من 7% اشيل وانت ساكت خشمك م تفتحو والا ح تضطر تمشي السوق تفتش كاش بنسبة خصم اقل وفي الحالة دي غالبا بتجي تلقاهم قفلوا … المهم الزول بتاع الكشك دا في ظرف ساعتين انا حساب معاهو باع كاش لاكتر 50 نفر يعني بالمعدل دا يومو بالميت بطلع ليهو تلاتة اربعة مليار وهو مرتااااااااح … نعتبر دا بلاغ مفتوح للسيد وزير الداخلية والسيد مدير الجوازات (شينة ساي بيع الكاش يتم داخل حوش الجوازات وشينة اكتر انو الجوازات ترفض التعامل بي بنكك) …. عجبي
الله غالب
