#قال إنهم جو من القضارف للخرطوم، جايين يطلبوا يد بت لأخوهم. وجابوا معاهم خالهم، أستاذ جامعي، راجل متعلم ومثقف و”بعرف يناضم ناس الخرطوم”.
#لكنهم وصلوا متأخرين، والدنيا كانت خريف، الأرض موحلة والطين في كل حتة..
#الجماعة نزلوا من العربية، والواحد فيهم شايل كميات فظيعة من الطين في كرعيه
#دخلوا بيت العروس، والطين طبع طبع في السراميك
فجأة، قام الخال المثقف من مكانه، وطلع للحوش، نادى على واحدة من البنات وقال ليها يجيبوا ليه مقشاشة وجردل مسح
#رجع دخل الصالون بي العدة دي قدام أهل العروس، لكنهم اعترضوا بشدة:
“لا لا لا.. مستحيل تخش تمسح، دا كلام شنو؟!”
#لكن الخال حلف وقال:
“زول غيري ما بيمسح!”
#وفي دقائق… الصالون بقى يلمع وسط دهشة واستغراب الحضور
بعد داك اتعرفوا الناس، والخال عرف نفسه:
“أنا الدكتور فلان الفلاني، أستاذ في الجامعة الفلانية.”
#الونسة مشت حلوووة، وأهل العروس وافقوا بكل حفاوة..
#لما طلعوا برة ، قال ليهو ابن أخوه:
“يا خال، حكاية المسح دي ما فهمتا؟”
#قال ليهو:
“نحن أول مرة نقابلهم، وغلطنا وجلبطنا الصالون. لو خليناهم ينضفوا براهم، حا يقولوا نحنا ناس عرب وطير وما عندنا تقدير ولا فهم ، ويمسكوا عليك وعلينا القصة دي لآخر يوم من حياتهم .. #فأنا قررت أحوّل التركيز من (الجماعة الجابوا الطين) إلى (الدكتور اللي مسح الطين)”
#أعتقد
القصة والرسالة واضحة وجات في وقتها…
#حرب الندامه والخراب !!!
#الآن في ناس كتار جدًا مقتنعين إنهم غلطوا لما دعموا الحرب، وإنو حكاية “الكرامة” كانت خدعة كبيرة، وإنو الخراب الحالي سببه المليشيات وتسييس العسكر وانفلات السلاح.
#ناس كتار فهموا، لكنهم انسحبوا أو اتفرجوا ساكت، خايفين من اللوم والتعيير من الناس الكانوا ناصحينهم:
“ما تدخلوا في طين الحرب.”
#لكن أنا شايف…
لو الناس دي أقرت بالخطأ وتحملت مسؤوليتها وساعدت في إزالة آثار الطين والخرمجة –
#فدا موقف شجاع، يستحق الاحترام، مش السخرية واللوم.
#نحن محتاجين نركز على السودانيين الشجعان الذين يتحركون لإيقاف الحرب وإنقاذ البلد
أكتر من تركيزنا على منو السبب.
#نحن الليلة كلنا محتاجين، وبشدة، لإيقاف الحرب.
#بطلنا الحقيقي ما هو الزول الكتل أكتر أو انتصر في معركة…
بل هو الزول القادر يوقف الحرب، ويعيد للسودانيين أمنهم واستقرارهم، ويبني أسس التنمية والعدالة والسلام.
🛑 #ما تخلي الكبرياء الزائف أو العزة بالإثم تمنعك من تلعب أعظم دور ممكن في حياتك:
#دورك في إنقاذ السودان.
#لو ربحنا، حنربح كلنا
#ولو خسرنا، حنخسر كلنا
#السودان_يناديكم
#أوقفوا_الحرب
#السلام_شجاعة
#السودانيين_أقوى_لما_يتوحدوا
