أكد الكابتن أحمد رمضان إن لعبة كمال الأجسام مش مجرد رفع أوزان وخلاص، لكن بتعتمد بشكل كبير على الأداء الصح، ضخ الدم للعضلات، وتكرار التمرين بالشكل السليم. وقال في كلامه إن التغيير في طريقة التمرين بقى ضروري جدًا، وده اللي بيخلّي الفارق ما بين لاعب عادي ولاعب مميز.
وأضاف كابتن أحمد إن كتير من اللعيبة بيهملوا نقطة مهمة جدًا، وهي التسخين، واللي بيعتبره واحد من أهم مراحل التمرين. وقال: “يا كوتش، التسخين ده كل مرة بنأكد عليه، لأنه بيحمي العضلات من الإصابات، وبيجهّز الجسم للمجهود اللي جاي”. وشدد إن اللعيبة لازم تبدأ تمرينها بتسخين كويس، سواء جري خفيف، تمارين إحماء، أو حتى تمارين إطالة بسيطة.
وأشار كمان إن التكرار الكتير هو سر اللعبة، مش الأوزان التقيلة، وقال: “كمال الأجسام مش معتمدة على الوزن… معتمدة على ضخ الدم والتكرار الكتير، والزاوية الصح اللي بتشغل العضلة بالكامل”. ونصح اللعيبة يركزوا في أداء التمرين، ومايبصوش للي حواليهم في الجيم، لأن كل جسم ليه ظروفه وطريقته.
ونبّه كمان إن أفضل وقت للتمرين هو الصبح، لأن الجسم بيكون في أحسن حالاته، مفيش ضغط ذهني ولا إجهاد جسدي، وده بيخلي التركيز أعلى والطاقة أفضل. وقال: “التمرين الصبح بيدي نتيجة مختلفة تمامًا عن آخر اليوم… جسمك بيكون فريش، وصافي الذهن”.
واختتم كابتن أحمد رمضان كلامه برسالة تحفيزية وقال: “استمروا… ماتستعجلوش النتيجة، الجسم بيتغير يوم عن يوم، ومع الالتزام هتشوف الفرق الكبير. بالتوفيق يا أبطال، وخليكوا دايمًا فاكرين إن اللي بيوصل هو اللي بيكمل، مش اللي بيبدأ بس”.
