. حبك والمطر
بشم ريحة هبة أنفاسك مع جيت الدعاش..
وأعيش .
وأشم عطر صندل عودك الناعم ..
مع ريحة التراب دغيش …
أصحصح ….وأنهض …
أفر جنحاتي لا حدن …..
ويقوم لي الريش .
أفرفش وأنتعش …
وكت بي موية المطر يبل الريش
وأشم شذي عطرك الفواح
كل ما تغتسل القناديل بي دفق الرشاش …..
وتخت راسا منكس على كتف القصب
من حمل الحبوب مدفوس .
تحيا الحياء فينا ..
ونبدأ نعيش .
ويشيل اللبن في العيش .
وأنداح .. ويجيني الراح .
قضارف الخير تزغرد ليك
ويقدل في رباه النيل
ويغني الطير .
وأحسك دفء وحنين غامر ….
وأبدأ أعيش …..
كأني أمير
طول ما السما بيبكي وعيونه طشاش .
أتاريك إنت والمطر توأم
يجود الخير على الأرض
الفيها البشر كم عاش .
سماك الحبلى بالأطفال
سحابك عمرو في ترحال
ولحظك زي البرق شغال
خريفك جاي وشايل الفال
وانت بتخبي في سماء عينيك
سحابات بتتدفق بشارات خير
وقمرك يضوي لينا الدار
وكان غاب السحاب نزعل
وتبكي السما …. ونفرح
وتحلب ضرعها الهطال
ونحن والبهم … نسرح
وينزل غيث والهوى….. ونمرح
ويجري الشوق فينا دافق
زي مجرى الخريف شلال
وتبكي عيونا….. تغمرنا
بتفضحنا وتكشف ريدنا …
كشف الحال
زي كشف المطر للدرب وحال
و يضيع من إيدنا ستر الحال .
وفي عينيك يضحكوا الأطفال
ومن أيديك كم عبوا وخموا …
وكم من شال .
بحبك والمطر شبهك
وبحبك والمطر زيك
بحبك والمطر منك .
وحبك والمطر في القلب
حبك والمطر ما زال .
يكب في جوه العروق ما زال .
حسن خالد حسين .
يوليو ٢٠٢٥ م
