بت عاديه – ع. هلاوي

بت عاديه .. ما عاديه ..
في الحنيه ..
تشبه ليا ..
ناس أم در .. شوارع أم در ..
بيوت أم در ..
وطعم الدنيا حريه ..

بت .. لو قلت تتلحن .. بتتلحن ..
تخلي الدنيا تتمحن ..
زي ضحكة نسايم أب روف
وكت ما تجيك
من المقرن ..
وزي لمة حبايب جمعه
تسمع في .. حقيبة الفن ..

بت .. حي العرب ..
والسوق ..
ناس ألعمده ..
شارع الشوق
َوشارع قلبك
المحروق ..
بت بي العرضه .. شارع ام بده ..
ناس الثوره .. عباسيه ..
وقفة طفله ..
في دكان ..
بتاخد في حلاوه لبان ..
وباقي قروشا ..
طحنيه ..

بت في تغير الأحوال ..
صبر الشهدا ..
بيت المال .. لون الذكري .. طعم الهجره ..
ود نوباوي .. عصريه َ..

بت بانت .. لا لانت َ.. ولا
هانت ..
بتشبه لي .. شوارع أم در ..
بيوت ام در ..
عيونا الحلوه عسليه ..
بت عاديه ..
ما عاديه . تشبه ليا …
ناس أم در .. شوارع ام در ..
بيوت أم در ..
وطعم الدنيا حريه …

عبدالوهاب هلاوي