بصيص الضي…
.فتح مداخلي اليك
وسع بصيص الضي
خليلي حضنك حوش
نفاجو يدخل ليي
أقشع بنور عينيك
عتمة دريبك ليي
نور لي درب الريد
وأرميلي ضلك فيئ
وجيب من ضياك و صفاك
أملالي كف إيدي
جمع سحاب الشوق
خلي اليكب لي شوي
بحرك دمير بيفور
كسر مجاديفي علي
ناديتك أنت عشم
بين الحلم و الصحي
صوتك صداه بعيييد..
يوقظ مسامع أضني
والدمعه ماليه العين
في الزحمة فتش ليي
فضفض كلام الريد
سمعني منك شيئ
خلي الهمس مسموع
يحكيبو سامر الحي
مغنى الغرام مفجوع
والجرح عايز كي
تحت الضلوع موجوع
قلبا بيخفق حي
ليه بس سقيتني دموع؟
أسقيني حنك مي .
ما تكون لي في الصحرا
زي الرهاب والضي
عايزك تكون لي نسيم
تبرد لهيبي الحي
سرج خيول حسنك
شد اللجام للحي
نفس الوجع مكتوم
بين الصهيل و أحي
صدرأ تنفس بيك
زود هواك علي
الحق صريع ممكون
الحالو ميت وحي
باقي العمر ما بيحوق
نلحق عقابو أزاي؟
حسن خالد حسين
