تسالم أنت بالعينين
وماك عايز تمد الأيد
وترسل بالعيون كلمات
وواقف أنت عني بعيد .
وترمي عليا بالبسمات
وعن لقياي باقي عنيد
ورا المرسال يجي المرسال
وشخصك لاقي منه صدود
تعال قرب عليا… تعال
معاك قلبي خفقه بزيد
وحاتك …ليك عيون حلوات
وأي كلام تقوله مفيد .
+++++++++++
أنا العارف لغة عينيك
معاهن ببقى حالي صعيب.
بتهرب أنت من لقياي
وترسل بي عينيك لهيب
وعارف الشوق علي كواااي
أريتك لو تجيني قريب.
تجيني الرهبه من عينيك
وأشعر زي كأني غريب.
أحس الرعشه في الاوصال
وفيك كل حناني يذوب
++++++++++++
أرتب في الكلام وأعيد
ويغلبني معاك أتكلم
وكل ما أجهز الكلمات
أقيف في لحظة أتبكم
انا العاشق طقوس عينيك
جاي باللهفه ليك أتلم.
وتبقى الونسه بالعينين
ويعجز عن فصاحتو الفم
لا راضي أنت تقول…
ولا لساني لاقي نضم
وأكون زي طفل يادوووب
بحاول يبدأ يتكلم
++++++++++++
صبحنا ما مع الناطقين
وصار الحال دوام صامتين
وباين في عينيك الخوف
وما عارفك تخاف لمتين؟؟
أتاريك مضاري القول
عن الحساد و الشامتين
تدسدس في كلام الريد
وواضح في عينيك يبين
وما بتدور كلامنا يزاع
ومرسله كله بالعينين .
صرح مرة بي حبك
بنصبر نحن عاد لمتين .
حسن خالد حسين .
