. كيف ما أغير
أنا يوم لقيتك أتوسمت فيك كل خير
غرست في قلبي الجريح شتلة أمل
وأتفاءلت بيك حقبة للحب النبيل
ورفقة للدرب .. وأروع مصير .
حسيت بأني وليد جديد في الدنيا من بعدما عشت الهجير
فرحت حروفي وغازلت كلماتي كل شيئ فيك جميل ونضير .
وبديت أرتب في الكلام علشان يكون نظمي في حقك مثير .
وكتبت بي أحساس محب أجمل غنا طالع من بين العصب ونبض القلب الفطير …
يتهادى بي فرحة وسرور .
كتبت في حسنك وفي طبعك و جمالك وفي رقة شعور .
في طراوة نداك وطلة بهاك وسحر العيون الضاوية نور .
مديت مساحات المنا في كل البراحات …. أنبل شعور
وحلمت في النوم وفي الصحيان حلما بيتكرر كتير .
وفلحت في أرضي الحقول الخضراء .. وشيدت القصور .
وعشمت في سحابات ريدك تجي وتمطر تزور .
وتشرق شمس وجهك صباح
ويومي يندى ويحتفي … و يلقى في جيتك فلاح ..
وتتجلى في أمسيات ليلي أبها البدور .
والنوم يعود للعين رضا ….نوما غرير .
وأنا كنت في حقك بغير …
لو مرة جابوا أسمك أو حتى سيرتك في أحلى قول .
ولو حتى النجيمات طلعت هناك تتلالا في أجمل حضور .
تديني أحساس أنها بتناجي فيك و بتغازلك… وليك تدور .
وكتير ما يغالطني الفضول .
وأحتار أنا ما بين جمالك وفتنتك ..
ومابين تقاسيم والوان الزهور .
يأحلى من كل الورود وأنقى من الماء الطهور .
ويا قطرة من طل الصباح لمن يكون على الأوراق منثور ..حبات بلور .
أنا كيف ما بغير ؟؟
وكل ما في الكون عليك بيتشابى ويتوق …
شان في قربك يصير .
وريني كيف ما أعشق هواك !!
وحبك معاي كل يوم بيزداد و بيكبر ..
ويتجمل كتير .
حسن خالد حسين .
