هاجر …
البنت الهامه
النخله القامه
الرطب الطاعمه
النبته الجاتنا من بركاوي والقنديلا
من ود لقاي
حدا السقاي
عند النيل من ساقية نوري
ربت بي جاي
ونبتت في جوانا
وشدت وتر إعصابنا
رزينه
رتينه
ضوت ليل سما أم درمان
وعندنا ظلت قايمه
تلعب في رملتنا
تباري درب سكتنا
زي وزينة في بحر أفكارنا
تسبح وحدها عايمه .
أن مدت أيدا تسالم فيك
بتقسم ليك محنه وشوق
تقدم ليك سكينه وطيبه
دافره عليك قدامه
ترفل في هندامه
قصيبة سكر
لين وأخدر.. داك قوامه
والبسمه تسابق فيها وسامه
والأنفاس في أنسامه
بنيه نديه
فريع اللوبيا
اللسه طريه
حلاوة العجوه
الرطب المشرق
طاعم وناعم
هو سلامه
والياسمين الأزهر في خديها
وجمال خجل الخد الأحمر فيها.
ضاحكه عنيها
تشع أنوار وضجيج عينيها
وناضمه الحكمه جوه كلامها
مرتب قوله
زي هندامه
ماعقلها راجح
وعلمها ناضح
ترسي الحكمه عليها
وتسكن فيها
بتروي الزول لو تاوق ليها
ويغرف بي كفيه نداها
ويشرب من الزوق رياها
ماهاجر زي النيل
ربنا سخر فيها المويه الحلوه
كل الناس منها تروي
ومن رياها خضر كل جروف العايله الكبري
وسكن فيها السلوي .
بنيه رقيقه
شفيفه رحيمه
كل بيت أو لمه دوام بالخير يطراها
كل أم أو عمه تتمناها
وتبقى الرحمه دوام تبراها
وأكيد والديها أدوها رضاها .
بنيه هديه رضيه
وشبها الأبيض وقلبها أبيض
ويومها بيصبح إبيض ..
بياض النيه.. عقب كاسيها
سعيد الزول البلقى رضاها
ويكون محظوظ البسكن في جواها
وين زيها بس يلقاها ؟
من العين بحميها الله
ومع الطيبين ربنا يرعاها
ويعيش أفراحها كل الناس
ويتهنوا الناس الهم رادوها
وتنعم بيها قلوب حاباها .
حسن خالد حسين
24/5/2018
