اول شاعر اتعرفت عليهو لما جيت جديد لنج من كسلا كانو
اتنين .. حسن الزبير وده عالم
براهو َوالصديق تاج السر عباس
ما اقدر اقول ليكم وين ومتين
.. بعض الناس بتكتفي بي انك عرفتهم والسلام ..
للحق انا من من خلال تاج السر عرفت ناس كتار .. هو الساقني وعرفني ولأول مره بي الشاعر سعدالدين إبراهيم عليه الرحمه المسطبه .. المسطبه دي كانت قدام بيت ناس سعد الدين مباشرة .. وكانت ملتقى في الامسيات الأصناف واصناف
من اهل الفن .. اقول ليكم منو واللا منو ما بجي بشكل منتظم للمستطبه ..
هسه خلو من المسطبه دي قصه براها تحتاج ورقه وقلم خلونا احسن هسه مع تاج السر عباس أجمل من عرفت في حياتي .. والله الاناقه الشفتها في تاج السر عباس .. وسيف الدين الدسوقي الله يرحمو ..
ما شفتها في شاعر ..
لو جيت لي شعر تاج السر عباس ده كلام براااهو .. يا اخ ده كتب
امير الناس .. وما زلت عني بعيد ما حركك احساس وهو طالب .. ده كتب للطيب عبدالله تمد الايد ونتسالم .. كأنك ما…..
زمان .. ولا الزول القبيل خاصم .. جننا جن .. وهو منو الما كتب ليها تاج السر عباس وجننا.. عليكم الله رأيكم شنو في زول بقول لي حبيبتو .. قبل.
ميعادنا بي ساعتين .. ابيتو أنا
وأباني البيت .. اغالط نفسي في
إصرار .. اقول أمكن انا الما جيت .. الله يديك العافيه يا تاج السر يا اخوي .. طيب الجا منو بدلك وواقف مستني حبيبتك .. الله يجننك ويجنن الشعر ذاتو
.. اغاني تاج السر لا اول ليها ولا
آخر .. وكلها ظابطه ورابطه ..
ده ما الموضوع .. الموضوع في
شخصية تاج السر ذاتا .. يا أخ
ده أطيب من الطيبه وارق من
النسمه وكريم كرم .. اصلا العندو ما حقتو .. ده شاعر موقف انسانيه أشبه ما تكون
بي البطولات .. انا عارفو من زمان .. من محاسن الصدف
الليله دي كنا في سيرتو معاي اخوي الشاعر من (منازلهم الفاتح الخير) .. وده ذاتو قصه ودايره حصه ..
اجيكم لي موضوع تاج السر .. طبعا هو من أنصار البعد من الاضواء رغم علاقتو بي أجهزة
الإعلام .. الصحافه الفنيه اولا
كل أفكار تاج السر القصايديه مجنونه زيو .. هو من النوع البتونس ويتونس غنا.. شاعر غنائي من الدرجه النوم وطبعا
ما كل شاعر شاعر غنائي .. شعرا
الغنا ديل صنف تاني لوحدو ومن أبرزهم تاج السر عباس ..
ما لاقاني شاعر وفي في علاقتو
بي أصحابو زي تاج السر .. وما لاقاني شاعر بحب الحب في روحو زي تاج السر عباس ..
صفات نادره كتيره بتميز بيها
أمير الناس ..
كان نفسي اكتب عنو الكتير
بس العيون الله يدينا خيرها
وليك محبتي يا تاج السر .. جات الحرب قالو مرقتها في السعوديه لكن جيت بعد راقت
حبتين .. ان شا الله تروق لي
للآخر .. ونتلاقى كان حيين يا
حب ..
