رضا التونسي
ناس كتير استغربت: إيه اللي خلّى الأرجنتين تطير لأنجولا وتلعب ماتش هناك؟ الموضوع مش صدفة… أنجولا كانت مجهزة احتفال ضخم وعايزين يعملوا حاجة تلفت أنظار العالم، فقالوا نجيب بطل العالم ونزيّن الليلة بوجود ميسي نفسه.
اللي اتسرب من الإعلام هناك إن أنجولا صرفت مبلغ خرافي علشان الحدث يطلع بالشكل اللي في دماغهم، فوق الـ12 مليون دولار ما بين الاتفاق مع الاتحاد الأرجنتيني والتجهيزات الكبيرة والاستقبال الأمني اللي اتعمل للبعثة من أول ما وصلت البلد.
وقبل ضربة البداية كان في مشهد لفت الأنظار… رئيس أنجولا نزل أرض الملعب، اتصور مع ميسي، وأهداه تيشيرت المنتخب عندهم.. لقطة كانت بالنسبة للأنجوليين مش مجرد صورة، كانت رسالة إنهم جابوا أهم نجم في اللعبة لبلدهم.
المباراة خلصت بفوز الأرجنتين 2-0، وميسي سجّل واحد من الأهداف.. والملفت إن ده أول هدف ليه مع التانجو على ملعب أفريقي، حاجة ما حصلتش حتى وقت ما لعب كأس العالم في جنوب أفريقيا زمان.. يوم كبير لأنجولا… ولحظة مختلفة لميسي.
