واحده من اشكاليات الانترنت انها بتصيب البعض بما يسمي برهاب المعرفه ،، وهو ما يدفع البعض الي الاعتقاد انهم وصلوا مرحلة من المعرفه تخولهم بالتحدث في كل الامور حتي لو كانت تحتاج لمتخصصين

عوض ابوشعرة
واحده من اسباب حيرتي ،، وما يتحير الا مغير ،، انك لما تفتح التايم لاين ،، تلقي بلابسة وبلبوسات بيفتوا في امور عشان تفتي فيها لازم تكون مثقف ومتابع وعندك خبرة في الحياة لا تقل عن عشرة الي عشرين سنه ،،
هسي التصريح الغليد حق الشاب الوجيه ده وصل لي نتيجتو كيف ومن وين وهو عمرو لا يزيد عن ٢٥ سنه حسب الصورة ،، ؟
وعشان ما ينط لي زول في حلقي ،، نقول عمرو ٣٠ سنه ،، اها ،، ال ٣٠ سنه دي لو خصمنا منها سنين الطفولة والصبا والتعليم العام والجامعي في جامعات الانقاذ ( قدر ظروفك ) ،،
فلو خصمنا السنين حقت التعلم والمعرفه الاساسية دي ،، باقي ليكم حتفضل ليهو سنين يكون اتثقف فيها وتابع واكتسب خبره تخليهو يفتي قدر ده ،، ؟
واحده من اشكاليات الانترنت انها بتصيب البعض بما يسمي برهاب المعرفه ،، وهو ما يدفع البعض الي الاعتقاد انهم وصلوا مرحلة من المعرفه تخولهم بالتحدث في كل الامور حتي لو كانت تحتاج لمتخصصين ،، وحسك عينك تغالط واحد موهوم بالمعرفه وهو طظ من سبحان الله ما بعرفا ،،
غايتو الجاتنا تختانا يا مجاهد نايل