** اسمحو لي اليوم أن احكي لكم قصة الأنشودة الالياذة ..عرس السودان

ضل الدليب ودالشريف
** اسمحو لي اليوم أن احكي لكم قصة الأنشودة الالياذة ..عرس السودان ……
في احد أيام شهر مارس العام 87 كنت جلوسا في مكاتب صحيفة الأيام بالخرطوم مع الاخ الاستاذ
فتح الرحمن النحاس …دخلت علينا فجأة الأستاذة اسيا عبد الماجد زوجة شاعرنا الكبير محمد الفيتوري وهي تحمل ورقة في يدها وبعد السلام قالت يا اخوانا
دي قصيدة من الفيتوري عايزه اوصلها للاستاذ محمد وردي في بيتو بالكلاكلة وما بعرف البيت …النحاس قاليها اديها الزول ده يقصد شخصي ..قالت ليهو الولد ده صغير وممكن يضيعها
قلت ليها صغير شنو انا اكتر زول بحب وردي والقصيدة دي اعتبريها وصلت وشلت منها الورقة وقبل ما اصل
بيتنا في الكلاكلة القبة اتجهت لمنزل وردي في الكلاكلة صنقعت وطرقت الباب حتي كلمتني ثريا زوجة وردي فتحت الباب و قالت لي اتفضل.. قلت ليها الاستاذ موجود قالت لي سافر عطبرة …قلت ليها خلاص لما يجي وقبل ما ينزل من العربية سلميهو القصيدة دي وهي من الفيتوري قالت لي تمام ……..في طريقي لمنزل وردي كنت أقرأ واندهش الكلام ده ممكن يتلحن وبعدها بشهرين بالضبط سمعتها عبر تلفزيون السودان ولذلك قصة …
كان وردي يجري بروفات للأنشودة باتحاد الفنانين وكانت الناس تتجمهر لمشاهدة البروفة وفي أحد الأيام لمح وردي الاخ الاستاذ علي الريح يقف مع الفراجة وكان مدير البرامج بالتلفزيون وقتها واوقف فنان أفريقيا البروفة وجاء.وصافح علي الريح وخاطبه ايه الجابك . أجاب شفت الزحمة وسألت وقالو لي وردي بعمل بروفات لعدد من الأغنيات ونزلت من عربيتي وجيت لاستمتع ..قام ابوالورود قال ليهو عندي ستة أغنيات ايه رايك نسجلة في التلفزيون …علي الريح قال ليهو الف مرحب بس ما عندنا ليك قروش …وردي قال ليهو انا ما عايز قروش بس عندي شروط انكم تفضو لي استديو من الثامنة صباحا وحتى منتصف الليل وذهب علي الريح لمدير التلفزيون الاستاد حسن التوم وقال ليهو محمد وردي عايز يسجل ستة أغنيات عندنا بس عايز يفضو ليهو استديو ليوم كامل وقال له المدير طيب مالو طوالي تفضو استديو هو نحن لاقين وردي وين وتم تحديد الموعد ودخل وردي استديوهات التلفزيون حوالي الساعة الثانية ظهرا ووجد علي الريح وزملائه يتناولون وجبة الغداء عبارة عن قرع بكسرة ونادي أحدهم وأرسله الي فندق السودان وقال ليهو جيب غداء زي الناس للجماعة ديل ودخل الاستديو وفرقته الموسيقية والكورال وسجل ست أغنيات وخرج عند منتصف الليل وكان قد تبقي تسجيل الحوار معه واختار النجمة سهام زروق وقتها لتجري الحوار وذهبت سهام وعلي الريح والفنيين والمخرجين الي الكلاكلة واستقبلهم زعيم الأغنية بترحاب كبير بل ضبح ليهم فطرو واتغدو وعملو الحوار واذيعت السهرة واستطاع التلفزيون بعد جهد توفير 3 ملايين لوردي وجاء واستلم المبلغ وقام بتوزيعه كله للذين أسهمو معه في إخراج السهرة ….عرس السودان يقول فيها الفيتوري …ياراية منسوجة من شموخ النساء وكبرياء الرجال ..ويقول ايضا .فدا لعيني طفلة غازلت دموعها حديقة في الخيال ……وكان اسمها ام درمان ..كان اسمها الثورة وكان العرس عرس عرس الشمال ..كان جنوبيا هواها وكانت ساعة النصر في اكتمال الهلال
** محمد عبدالقادر ابوشورة ربطتني به علاقة حميمة وكان كل ما يلتقيني يسألني لماذا لا يذاع نشيد …حدق العيون ليك يا وطن بصفة مستمرة عبر الإذاعة والتلفزيون .وكنت برد عليهو …التلفزيون ما فاضي من البرامج التقليدية المملة والاذاعة ميالة للبرامج الكلامية ……فجعت برحيل ابوشورة وتملكني حزن عميق واللهم لا اعتراض في حكمك ….ابوشورة كتب ..حدق العيون ليك يا وطن تغني بها وردي . النيل كساك هيبة وجلال يا ملهم الشعب النضال …انت العليك غني الخليل وطرز عتيق ارضك جمال .. وكتب عدد من الاغيات تغني بها عدد من الفنانين . بينهم محمد ميرغني …..عاطفة وحنان يا ناس …. نسأله تعالي أن يتغمده بواسع رحمته ويسكنه فسيح جناته

** لا أمل الاستماع لرائعة زيدان ابراهيم …..بقيت ظالم نسيت الناس …..كتبها مصطفي عبد الرحيم المظلوم إعلاميا ..زيدان اخلص في أدائها خاصة في الكوبليه الاخير …احبك اه احبك

** ابراهيم الكاشف رحمه الله لم يدرس موسيقي ولم يدخل معاهد للصوت والتوزيع الموسيقي وعمل ده كل …قدم اروع الأغنيات واروع الالحان …يعني ما عارف لو درس كان عمل شنو …وداعا روضتي الغناء وداعا معبدي القدسي …الحبيب وين قالو لي سافر . . انا افريقي انا سوداني …والكاشف غني لعدد من الشعراء علي رأسهم السر قدور وحميدة ابوعشر وعبيد عبد الرحمن … . عصام محمد نور قدم أغنيات الكاشف عبر شريط أطلق عليه عبقرية الكاشف ولم يكن مثل الكاشف

** قبل عامين وفي مثل هذه الأيام غادر دنيانا الفانية المبدع الكبير محمد الامين وتم تشييع جثمانه الطاهر بأمريكا بعيدا عن أرض الوطن الذي أحبه وغني له …..وطني نحن سيوف امجادك ونحن مواكب تفدي ترابك …..أسرة عبد الكريم الكابلي تمكنت من نقل رفاته من امريكا لمقابر حلة حمد ببحري . فهل فكرت أسرة ود الامين في نقله جثمانه لودمدني أو ود النعيم حتي يدعو له الناس في مقبرته

** اين فنان عطبرة مضوي والذي يجيد غناء المناحاة .
الوليد الضيف ضيعتن كيف
** الراحل ابرهيم موسي أبا اجمل صوت قدم لنا من كردفان ….عيني عليك باردة يا السمحة يا الواردة …….يا فقرة ردولي روحيتي الهناك شاردة
** المغني الشاب احمد الصادق ظهر في حفل بالقاهرة بصوت متعب ولم يكن في مستوي الحدث والجمهور كان كبير جدا وعاد حزينا
** جمال فرفور صالح اتحاد الفنانين بالاعتذار ام ما زال عند موقفه .
** هنالك فنان شاب صوته يشابه صوت بلال موسي
** شاهدت فيديو لمغني شاب يدعي علي الشيخ يردد رائعة سيد خليفة
..داري عينك …عينيك داريها ….وأبدع في أدائها ولم يشوهها
** في المديح النبوي استمع لاولاد حاج الماحي فقط واستمتع شديد بمدحة ..اسد الله البضرع
* قالو لي انساهو وامسح من خيالك زكرياتو
وانسي كل الماضي وابعد عن طريقو وعن حياتو
فات وخلاك للزمن
وضاعت آمالك سدن
ليه تحن من تاني ليه
وليه تفكر في صلاتو