. أنشودة القصر
. حسن خالد حسين
يوم فرسان الجيش ما دخلوا القصر
كانت أعظم ملحمه وأجمل نصر
سكبوا الدم الغالي وفاض النهر
مهرا غالي فدوه في أفضل شهر
للسودان العايش دايما سامي وحر
**************************
بلد أتوحد شعب وجيش
قسموا يمينهم تاني عميل مافيش
ولا حتى دخيل في بلدنا بعيش
هبوا وثاروا وأضحوا وحوش
سودانا بلدنا ونحن رجال الجيش
غور ياالباقي العادي ويا شيطان الشر معليش.
****************************
يبقى القصر سيادى منارنا وهو الرمز
من تاريخ أجدادي كان ويظل هو العز
واليوم أحفادهم جوة سياجه عليه بتركز
لاحد من بابه بيرجع أو حتى بفز
نفخر بيك يا قصر بلادي وفيك نهز
ونرفع علمك عالي في ساري القصر
***************************
ديل أبطال فرسان أسياد ورجال
خاضوا معارك حرب كرامة بعز و سجال
لارمشت عين لا فرد دقس لا مال
لا نزحوا وفاتوا لا قالوا الحرب محال
هم فزعوا وجمعوا الصف في أحسن حال.
وأقتحموا القصر رباطة جأش.. هم الأبطال .
***************************
سيظل ساريك مرفوع قبالة النيل
لابيدنس شرفاتك وأرضك مرة دخيل
ما دام حراسك هم أولادك وفخرك ديل
فألتنعم عزة وتهنأ مهيرة وتزيد تهليل
زغرودة نصرنا تطلع تقطع صمت الليل
ياقصرنا خالد وديمة عزيز ما بتبقى ذليل
مادام أرحام ولياتك لسه بتلد جميل
مادامت أرضك خصبة علينا الخير بتكيل
مادام قدامك وعند أبوابك يجري النيل .
حسن خالد حسين .
٢١مارس ٢٠٢٥ م
